وەزارەت تەندروسی عراق، ئمڕوو دووشەممە، خەوەردا 16 تویشهاتن نوو وە "تەو خوینوەربوین" توومارکردنە، دووپاتکرد لە مردن دوو کەس وە هەمان ڤایرۆس لە ماوەی چەن رووژ گوزەشتە.

قسەکەر وەزارەتەگە سەیف بەدر، ل تووماریگ دەنگی رەسیە ئاژانس شەفەق نیوز راگەیان، "زیقار یەک پسای مردن توومارکرد و دویەمین پسای ها لە واست".

بەدر دیاریکرد "کوو گشتی تویشهاتن وە تەو خوینوەربوین لە سەرەتای ئمساڵەو تا ئیسە 231 حالەت بویە وەرد 30 مردن" وتیش؛ لە زیقار 84 تویشهاتن توومارکریاس کە 4 کەسیان مردنە، لە بەغدای پایتەختو دیاریکریاگی لە لای رەسافە 32 تویشهاتن توومارکریاس کە 6 کەسیان مردن، و لە پارێزگای موسەنا 20 تویشهاتن و یەک مردن".

بەدر دیاریکرد، "لە واست 19 تویشهاتن وەرد 3 مردن توومارکریا لە بەسرە 15 تویشهاتن و یەک مردن، و لە دیالە 12 تویشهاتن و 3 مردن و لە میسان 11 تویشهاتن و یەک مردن توومارکریاس" وتیش " لە نەینوا 7 تویشهاتن وەبی مردن، لە بەغدا لای کەرخ 6 تویشهاتن وەبی مردن، و لە کەرکوک 5 تویشهاتن و 4 مردن، و دیوانیە 5 تویشهاتن و دوو پسای مردن".

دیاریکرد " لە دهۆک 3 تویشهاتن و یەک مردن توومارکریاس باوجی لە بابل دوو تویشهاتن و یک مردن و لە هەولێر و سلێمانی هەریەکیان دوو تویشهاتن توومارکردنە، لە نەجەف دوو تویشهاتن و دوو مردن، لە ئەنبار و کەربەلا هەریەکیان یک تویشهاتن توومارکردنە".

لەباوەت تەمەیل، بەدر دیاریکرد "هەوەجەس  هاووڵاتیەیل  تەنیا گوشت لە فرووشگایەیل ریگە وەپیدریاگ بسینن، یەک چەقوو ئەرا گووشت بڕین دانەن، هەمیش گرنگی وە پاکوتەمیزی بیەن و دەسکیش بپووشن" دیاریکرد "بایەت گوشت لە شوینیگ فرە هوونک هەڵبگرن و لە پلەی گەرمی فرە بەرز بکوڵننەی".