شەفەق نیوز/ کەسەی کەشناسی عراق، ئمڕوو سێشەممە، مەزەنەی کەشوهەوای وڵاتەگە ئەرا ئی رووژەیل بانانە بڵاو کرد، و باس شەپوولیگ واران کرد.

دەسەگە لە بەیاننامەیگ رەسیە ئاژانس شەفەق نیوز وت: کەشوهەوای سوو چوارشەممە، رووشنە وەگەرد لەکە ئەوریگ، و مەوقەی شەوەکی تەم دروس بوود و کەمکەم نیەمینێد، و پلەی گەرمی لە ناوچەی ناوڕاس نزیک رووژ وەرجە خوەیە و لە ناوچەی باکوور و باشوور کەمیگ بەرزەو بوود.

وتیش: رووژ پەنجشەممە، ئاسمان رووشنە وەگەرد لەکە ئەوریگ، کەمەکەم بوودە نیمچە ئەور، وەگەرد دەرفەت نمە وارانیگ لە ناوچەی باکوور وەشەو، و پلەی گەرمی لە ناوچەی ناوڕاس کەمیگ بەرزەو بوود، و لە ناوچەی باکوور و باشوور نزیک رووژ وەرجە خوەیە.

دیاری کرد کە رووژ جمعە، لە گشت ناوچەیل وڵاتەگە ئەورە، وەگەرد واران زاێین لە بەشەیل باکوور و بەشەیل خوەرهەڵات لە ناوچەی ناوڕاس و ، و پلەی گەرمی لە ناوچەی باکوور کەمیگ نزمەو بوود، و لە ناوچەی ناوڕاس و باشوور نزیک رووژ وەرجە خوەیە.

دەسەگە وتیش: کەشوهەوای وڵاتەگە ئەرا رووژ شەممەی ئایندە نیمچە ئەورە تا ئەور تەواوە وەگەرد واران لە ناوچەی باکوور، و پلەی گەرمی لە ناوچەی باکوور نزیک رووژ وەرجە خوەیە، و لە ناوچەی ناوڕاس و باشوور چەن پلەیگ نزمەو بوود.