شەفەق نیوز/ پسپۆڕیگ لە چین کەشناسی، ئمڕوو پەنجشەممە، باس زانیاریەیل گرنگیگ لە کەشوهەوای عراق و هەرێم کوردستان کرد، ک وت: پلەی گەرمی تا کۆتایی مانگ ئاب هەر وە بەرزی مینێد، و لە خود وەختەگە، مەزەنە کرد کەشوهەوای مانگ ئەیلول ئایندە هوونک بوود.

ئاراس جەبار شارەزای کەشناسی کورد، لە پۆستیگ لە سۆشیال میدیا نویسان: مەزەنە هەس شەپوول گەرمیەگە لە ناوچەمان تا هەیشت لە مانگ ئاب بمینێد، و لە خود رووژەگە تا ١٤ی ئاب شایەت ناوچەگەمان بکەفێدە کارگەری پارچە وای سەردێگ لە دریای ناوڕاس تیەێد، ولەی ماوە پلەی گەرمی لە دوو تا سێ پلە داوەزێد، وتیش: تا رادەیگ ئی پارچە لەی گەرمیە کەمەو کەێد.

هەمیش وت: ناوچەیل ناوڕاس و خوەرئاوای عراق کاریگەری ئی پارچە لەبانیان زیاتر بوود، و تووز و وا گورجەو کەێد، ک زیاتر پلەی گەرمی داوەزنێد، ک لە ٦ تا ٨ پلە لەی گەرمی سەختە داوەزێد.

جەبار وتیش: لە رووژەیل ١٣ تا ٢٠ ئی مانگە، ئەگەر زیایبوین وەرەو لە پلەی گەرمی هەس، و مەزەنە کریەێد ئیجا ماوەی شەپوولەگە زیاتر بوود، ئەراوە، ئی مانگە چوینکە ماوەی گەرمەگە فرەس، پلەی گەرمیی لە تەمووز زیاترە.  

وتیش: وەگورەی بڕیگ سەرچەوەیل کەشناسی، مانگ ئەیلول لە ریژەی گەرمیەگەی سرووشتی بوود، ئەگەر چشتیگ ئاڵشت نەوود بوودە مانگ سەردیگ و گەرمیی بەرزەو نیەوود.