شەفەق نیوز/ سەرچەوەیگ ئەمنی، ئمڕوو جمعە، خەوەردا ک پارێزگای نەینەوا شەویگ پڕ لە سیمای رووداوەیلیگ هاتووچو وەخوەی دی، بەشیگیان سەخت بوین، لەوەر تەمە خەسەگە ک ئەیە دوو رووژە گشت وڵاتەگە پووشاگە.

سەرچەوەگە ئەرا ئاژانس شەفەق نیوز وت: لەلای کەمەو ٨ رووداو هاتووچو بویە، ٣ لەلیان وەجووریگ سەخت بوین، رووداوەگان لەوەر تەمەگە و نەمەنی نووڕستن قومیان، ولە فرەی رووداوەگان، یا ماشینەگان لەڕی درەچگن یا کەفتنە چاڵ و دووڵەگان لە کنار ریەگان، وەتایبەت لە ریە دەیشتیەگان.

وتیش؛ لەناو هەیشت رووداوەگە، ٤ لەلیان لەناوچەیل باشوور مووسڵ بوین، و دووان لە رەیەگەی وەرەو ناوچەیل خوەرائاوای نەینەوا ری مووسڵ- تەلەعفەر.

سەرچەوەگە ئاماژە کرد ک هیچ مردنیگ لەو رووداوەیلە تۆمار نەکریار تەنیا زەخمەیل کەمیگ لەلای بەشیگ لە شۆفێرەگان.