شەفەق نیوز/ محمد شیاع سودانی، سەرۆکوەزیرەیل عراق، ئمڕوو چوارشەممە، راگەیان کە بڕ هاوردەکردن کاڵا و بەرهەمە بیانییەیل عراق ساڵانە رەسێدە 70 ملیار دۆلار، دووپاتیش کرد  کە حکومەتەگەی کار کەێد ئەرا سنووردارکردن چگن ئی بارستە درایی گەور ئەرا دەیشت وڵات.

 ئەوەیش لە وتاریگ هات مەوقەی وازکردن سەنتەر بازرگانی (تەعاون هایپەرمارکێت) لە بەیاع ئەرا فرووشتن خۆراک و کاڵا  وە نرخیک پاڵپشتیکریاگ لە بەغدا پیشکەشی کرد و هەمیش وازکردن فەرمانگەی تەلەفزیۆن و ٥ سەنتەر بازرگانی ترەک، کە لە ناوچەیل حوڕییە، ساڵحیە، شەعب، جادەی فەلەستین و جەمیلە بوین.

لەناو رسوومەیل وازکردن ئەو ناوەندەیلە، سودانی کار جیوەجیکاری ئەرا ٢٣ پڕۆژەی هاوشیوە لە بەغداد و پارێزگارەیلیش گرێدەو.

 سەرۆک وەزیرەیل لە وتاریگ کە لە ناو مەراسیمەگە پێشکەشی کرد، راگەیان کە “ساڵانە عراق وە بەهای 70 ملیار دۆلار کەلوپەل و بەرهەم هاوردە کەێد، شمارەیگ کە بایەسە بووسێدەو و کار ئەرای بکرێد، چوینکە وەزارەت بازرگانیش بەشیگە لەو تەقەلایلە کە کار ئەرا وازکردن ری ئەرا کەرت تایبەت واز کەێد ئەرا پڕەوکردن شوین بۆشاییی ئی هاوردە کە دراو بیانی کەمەو کەێد”.

سودانی دووپات کرد کە رۆڵ وەزارەت بازرگانی تەنیا لە ئاڵوگۆڕی بازرگانی سنوردار نییە، بەڵکم رەسێدە گاڵداین پیشەسازی نیشتمانی، لە ری دابینکردن خوازینەیل بازاڕ ناوخۆیی، وتیش: هەناێ باس لە ئاسایش خۆراک ئەرا هاووڵاتی کریەێد، بایەسە دەوڵەت ئامادە بوود.

هەمیش وت: "ئیمە نرخ خۆراک کۆنترۆڵکردیمن، وە هاوکاری وەرد کەرت تایبەت، وەگەرد ئەو کاریگەرییەیلە کە نرخ دراو بیانی کەفێدە رویی"، باس بەرزەوبوین نرخ ئەو کەرەستەیلە کرد وەرد سەرهەڵدان جەنگ رووسیا و ئۆکرانیا.

سودانی وتیش: "ئیمە هاوبەشی وەرد کەرت تایبەت کردیمنە ئەرا وازکردن شوین فرووشتن ئەرا نمایشکردن خۆراک و کاڵایل ترەک کە هاووڵاتی خوازێد".

سەرۆک وەزیرەیل پەیمان دا “بیرۆکەی (هاوکاری هایپەرمارکێت) درویژەکریای بیرۆکەی بازاڕە ناوەندییەیلە، بەڵام وە رووبەریگ گەورەتر و کاڵای هەمەچەشنتر، وەگورەی ئاڵشتبویەیل ئابووری” دووپات لەوە کرد کە ئامانجەگە دابینکردن نرخیگ خوارتر وەرانوەر نرخ بازاڕ.

سودانی وتیش: “پرۆژەی هاریکاری هایپەرمارکێت ئامانجیگ وەزارەت بازرگانییە ئەرا رەسین وە ریژەیگ سەدی کەلوپەلی ناوخۆیی و دروسکریای لە ناو عراق، کە ریژەگەی لە 60% کەمتر نەوود لە کەلوپەلەیل نمایشکریاگ”.

دیاری کرد کە "ئیمە گاڵ ئەو ناوەندەیلە دەیمن وەگورەی ئی مۆدێلە، و ئەو کاڵا و بەرهەمەیلە کە پێشکەشی کەن"، داوا لە بازرگانەیل و کەرت تایبەت کرد کە سوود لەو پشتیوانی ئیسەی حکومەتە بگرن، "کە پاڵپشتییگ بیوینەس".

سودانی باس ئەوە کرد کە "پشتیوانیکردن کەرت تایبەت لە دابینکردن گەرەنتی سەروەری ئەرتگا پڕۆژە پیشەسازییەیل دەسوەپی کەێد، لەڕی سندوق عراق ئەرا گەشەپیدان، و ئەرا چاکسازییە ئابوورییە وەردەوامەیل کە لایەنەیل کەرت دارایی، باج، قەرز و بانک لەخوەی گرێد".

سەرۆکوەزیران عراق لە درویژەی قسەیلی وتیش: “ئەو ژینگە کە ئیمە ئەرا کەرت تایبەت دابینی کەیمن، لەو بنەما سەرچەوە گرێد کە هویچ جیگریگ نییە تا دەوڵەت عراق پاڵپشتی ئی کەرتە نەکەێد و لە گشت رویەگەوە بەرزیەو بکەێد”.