شەفەق نیوز - ریاز

قسەکەر وەناو هێزەیل "هاوپەیمان پاڵپشتییکردن شەرعییەت لە یەمەن" لیوا روکن تورکی مالکی، ئیوارەی شەممە، راگەیان وە وەرپەرچداین و ویرانکردن دوو فڕۆکەی بیفڕۆکەوان لە هەردوگ ناوچەی ریاز و باشوور کە گرووپ حووسی کلیان کردۊد.

 ئی راگەیاننە لە چوارچیوەی زنجیرەیگ لە ئۆپەراسیۆنەیل وەرپەرچداین دووپاتەوبۊ تیەێد کە لە ماوەی رووژەیل دویایی فڕۆکەیل بیفڕۆکەوان و مووشەکەیل لەخوەی گرد کە گرووپ حووسی وەرەو چەن ناوچەیگ سعودیە کلیان کردۊد، کە لە ناویان ریاز و مەککەی پیرووز و ناوچەی خوەرهەڵات و ناوچەی باشوور.

دۊکە جمعە، گرووپ ئەنسارولڵا "حووسییەیل"، راگەیانن وە ئامانجگردن فڕۆکەخانەی ناودەوڵەتی خالید لە ریاز وە فڕۆکەیگ بیفڕۆکەوان.

 ئی وەرەونواچگنەیلە لە سای ئاڵووزکردن گرووپ حووسی ئەرا پەلامارەیلی لە دژ سعودیە تیەێد لە تەموز/ یۆلیۆ 2026ەو، کە لە ماوەی تشرین یەکەم/ ئۆکتۆبەر گوزەشتە تونەو بۊ، وەرد زیایکردن وەشانن مووشەک و فڕۆکەیل بیفڕۆکەوان وەرەو فڕۆکەخانە و دامەزراوەیل نەفتی و شوینە سەربازییەیل لە شانشینەگە.

هەمیش ئی وەرەونواچگنەیلە لە سای بەرزەوبۊن رۊوەرۊبۊنەوەیل ناوەین حووسییەیل و هێزە پاڵپشتییکریاگەیل لەلایەن سعودیەو لە یەمەن تیەێد، هاووەخت وەرد فراوانەوبۊن ئۆپەراسیۆنە سەربازییەیل لە باشوور خوەراوای وڵاتەگە، و وە تایوەت پارێزگای تەعز و ناوچەیل نزیک لە تەنگەی باب مەندەب.

 لە ئازار/ مارس 2015ەو، سعودیە سەرکردایەتی هاوپەیمانییگ سەربازی کەێد ئەرا پاڵپشتییکردن حکومەت یەمەنی دانپیدانریاگ ناودەوڵەتی لە رۊوەرۊبۊنەوەی حووسییەیل، کە کۆنترۆڵ سەنعای پایتەخت و پارێزگایەیل ترەک کەن لە ئەیلول/ سێپتێمبەر 2014ەو.