شەفەق نيوز- نەينەوا
لە سیمایگ ناوازە لەناو ژوور نەشتەرگەری لە خەسەخانەی ناودەوڵەتی حەیات لە شار موسڵ، گورانییگ خەڵک زاحۆ، کەفتە ژیر نەشتەرگەری دەگمەنیگ ئەرا لاوردن پەنامیگ لە سەری، و لە مەوقەی ئەنجامدان نەشتەرگەری لەژیر سڕەوکردن نیمچەیی، مۆسیقا وە عوود ژنەیاد، وەگەرد چەودیاریکردن هویردیگ لەلایەن تیم پزشکی.
دکتۆر ئوسامە مەشهەدانی دامەزرێنەر خەسەخانەی ناودەوڵەتی حەیات و سەرۆک زانکۆی حکومەتی نەینەوا، ئەرا ئاژانس شەفەق نیوز وت: بیمارەگە گورانیچڕە و عوودژەنە خەڵک شار زاخۆ، پەنامیگ لەناو مەغزی داشت، ئەراوە نەشتەرگەری ناسیکیگ خوازیە کە بایەسە بیمارەگە مەوقەی نەشتەرگەری لەهووش تەواو خوەی بوود.
مەشهەدانی وتیش: مۆسیقاژەنین مەوقەی نەشتەرگەری کاریگ هێمایی نەوی، وەلێ گامیگ پزشکی زانستی بوی، تا بزانیمن دەمارەیل کار کەن، وەتایبەتی جویلەی دەسەیل، و گونجیان جویلە، تا دڵنیا بویمن کە ئەرکەیل مەغز مەوقەی لاوردن پەنامەگە هەن.
وتیش: نەشتەرگەریەگە وەدەس دکتۆر عراقی یەحیا جحێشی ئەنجام دریا، کە یەکیگە لە دیارترین پزشکەیل نەشتەرگەری دەمار لە وڵاتەگە، و تیم پزشکی لەناو ژوور نەشتەرگەری وە یاوەریی بوین، و چشتەیل تەمیس کردیان، وەگەرد ئامێر عوودەگەیش، ئەرا دروسکردن ژینگەی نەشتەرگەری بیوەییگ.
دیاری کرد کە ئیحوبرە لە نەشتەرگەری ناوازەس لە ئاست جیهان، و لە شمارەی کەمیگ لە دەوڵەتەیل ئەنجام دریاس جویر سویسرا و فەرەنسا، وەلێ لە عراق یەکەمە.
لە کۆتایی وتیش: چەوەڕی دەرئەنجامەیل چەودیاریکردن پزشکی دویای ئەو نەشتەرگەرییە کەیمن، و ئومید دیریمن ئی گامە بوودە بڵویزەی ئومیدیگ لە چین نەشتەرگەریە سەختەیل لە وڵات.