شەفەق نیوز - بەغداد
سەرچەوەیگ حکومەتی، رووژ یەکشەممە، ئاشکرا کرد لەباوەت سەردانیگ فەرمی کە سەرۆک وەزیرەیل عراق عەلی زەیدی وە نیازە ئەنجامی بەێد ئەرا قاهیرەی پایتەخت میسر، رووژ دووشەممەی هەفتەی ئایەندە، لە سەرۆکایەتی شاندیگ حکومەتی باڵا، ئەرا باسکردن دۆسیەیل سیاسی و ئەمنی و ئابووری، لە نوایانیان هاوکاری لە بوارەیل نەفت و وزە و چەکدارکردن.
سەرچەوەگە ئەرا ئاژانس شەفەق نیوز وت، کە "زەیدی چەوی کەفێدە وەرپرسە میسرییەیل، ئەرا باسکردن شمارەیگ لە دۆسیە گرنگ و هاوبەشەیل لە ناوەین بەغداد و قاهیرە".
ئاشکراش کرد کە "گفتوگۆەیل هازدارکردن پەیوەندییە سیاسییەیل و هەماهەنگی ئەمنی، و فراوانکردن هاوکاری ئابووری و بەرهەمهاوردن گرێدەو، بیجگە لە دۆسیەیل نەفت و وزە و چەکدارکردن".
سەردانەگە تیەێد دۊای گفتوگۆەیل سەرەتایی کە وەزیر دەیشت میسر بەدر عەبدولعاتی وەرد زەیدی لە بەغداد ئەنجامی دا، لە 18 تشرین یەکەم/ ئۆکتۆبەر گوزەشتە، کە باس لە فراوانکردن هاوکاری ئابووری و بازرگانی و وەبەرهێنان، و زیایکردن بەشداریکردن کۆمپانیا میسرییەیل لە پڕۆژەیل ژێرخان و دووارە ئاوەدانکردنەوە لە عراق کرد.
عەبدولعاتی لە ماوەی چەوپێکەفتنەگە سڵاو سەرۆک میسر عەبدولفەتاح سیسی گواستۊدەو، و دووپات کرد لە چەوەڕیکردن قاهیرە ئەرا پێشوازیکردن لە زەیدی لە تەنیشت کارکردن لەبان کاراکردن میکانیزم هاوکاری سێانی لە ناوەین عراق و میسر و ئوردن، وە تایوەت پڕۆژەیل گریەداین کارەبایی و نەفتی.
سەردان قاهیرە کەفێدە ناو زنجیرەیگ لە جۊلە دبلۆماسییەیل کە زەیدی لە ماوەی هەفتەیل گوزەشتە ئەنجامیان دا، کە وە سەردان سعودیە لە 14 تشرین یەکەم/ ئۆکتۆبەر دەس وەپێ کرد، لە ماوەی چەوی کەفتە شازادەی جێنشین ئەمیر محەمەد بن سەلمان، وەرجە ئەوەگ وەرەو ئوردن بچوود لە 26 خود مانگەگە و وەرد شا عەبدولڵای دۊیەم گردەو بوودەو.
لە 28 تشرین یەکەم/ ئۆکتۆبەر، زەیدی سەردان دیمەشق پایتەخت سووریا کرد، کە لەورا چەوی کەفتە سەرۆک ئەحمەد شەرع، و وەردی باس لە دۆسیەیل ئاسایش سنوورەیل و هاوکاری ئابووری و وزە کرد، لە ناویان ئەگەر دووارە خستنەکار کڕ لۊلەیل نەفت عراقی لەڕی خاک سووریاو ئەرا بەندەر بانیاس.
هەمیش لە چوارەم تشرین دۊەم/ نۆڤەمبەر ئیسە سەردانیگ فەرمی ئەرا بەحرەین ئەنجام دا، کە یەکەم سەردانە ئەرا سەرۆک وەزیرەیلیگ عراقی ئەرا مەنامە لە ساڵ 2003ەو، باس لە هازدارکردن پەیوەندییە دووانیەیل و هاوکاری ئابووری و هەماهەنگی لەباوەت وەرەونواچگنە هەرێمییەیل کرد.
زەیدی، لە 17ی تشرین دۊەم/ نۆڤەمبەر ئیسە، سەردانیگ فەرمی بڕیاردریاگ ئەرا بەیروت پایتەخت لوبنان دواخستۊد، دۊای بەرزەوبۊن ئاڵۆزی ئەمنی و سیاسی لە ناوچەی جوڕف سەخەر لە باکوور پارێزگای بابل.
سەرچەوەیگ حکومەتی ئەو وەختە ئاژانس شەفەق نیوز ئاگادار کردەو کە دویاخستن سەردان لوبنان لەوەر وەرەونواچگنە ئەمنییەیل لە جوڕف سەخەر هات، و ئەوەگ شایەد بخوازێد سەرۆک وەزیرەیل لێرا بوود، جۊر فەرماندەی گشتی هێزە چەکدارەیل، ئەرا وەدۊاچگن هەڵوێستەگە و جیوەجیکردن بڕیارە پێویستەیل.