شەفەق نیوز/ عەبدولەتیف جەمال رەشید سەرۆک کۆمار، هوشداری دا لە وەردەوامی زیایبوین خەرج وەکارخستن لە بودجەی گشتی کە ئەرا سپۆنسەرکردن مووچەی مانگانەی فەرمانبەرەیل و کارمەنەیل کەرت گشتی لە وڵات تەرخان کریاس، دووپاتیش کرد لەبان گرنگی پشتگیریکردن کەرت تایبەت تا ئابووری وەرەو نوا تەکان بەێد.

ئەوەیش لە وتاریگ شەو دووشەممە لەبان سێشەممە، لە "ماڵ" كوردستانی" لە "داڤۆس" پیشکەشی کرد، کە سەرۆک عراق لە گردەوبوینەیل کۆڕبەند ئابووری زانستی لە سویسرا بەشداری کەێد.

رەشید لە وتارەگەی وت: گیچەڵ مووچەیل تەنیا لە هەرێم کوردستان نییە، کە لە عراق نزیکەی 80% لە بودجەی دارایی گشتی وڵات ئەرا مووچەیل چوود.

وتیش: ئی ریژە لە بودجەی وەکارخستنە ساڵ دویای ساڵ زیایەو بوود، و هەژمار عراق رەسیە 45 ملیۆن کەس، و 56% لەی شمارە دویای ساڵ 2003 لەداڵگبوینە.

سەرۆک کۆمار وتیش: گاڵ خاوەن سەرمایە و بەرهەمهاورەیل کورد دەێد ئەرا بەرهەمهاوردن لەو ناوچەیل عراق لەسای ئارامی ئەمنی لە وڵات.

لەتیف لە وتارەگەی بانگەواز کرد ئەرا کارکردن و ئەوزەڵداین کەرت تایبەت وەشیوەیگ بکەفێدە بەرژەوەنی هەرێم کوردستان، تا فشار مووچەیل مانگانە لەبان حکومەت هەرێم کەمەو بکەێد، وتیش؛ ئەگەر ئەو کارە نەکەیمن ئابووری وەشیوەی خاسیگ گەشە نیەکەێد لە هەرێم و لە گشت عراق.