شەفەق نیوز/ عەبدولەتیف رەشید سەرۆک کۆمار عراق، ئمڕوو یەکشەممە، هوشداری دا لە ئاڵشتبوین کەشوهەوا و سەختیەیل وەبان ژینگە، و کاریگەری ڕاستەخۆی وەبان ئاسایش تەندروسی گەلەیل، و دووپات لە پابەندبوین عراق کرد وە هاوکاری وەرد کۆمەڵگای ناودەوڵەتی ئەرا پەیاکردن چارەسەریەیل وەردەوام و گورج ئەرا ئەو سەختیەیلە.
ئەوەیش لە وتاریگ لەناو یەکەم کۆنگرەی ناودەوڵەتی ئەرا ئاڵشتبوین کەشوهەوا و کاریگەریەیلی وەبان ئاسایش تەندروسی لە عراق - بەغداد پیشکەشی کرد.
لەتیف لە وتارەگەی وت: ئاڵشتبوین کەشوهەوا تەنیا سەختییگ ژینگەیی نییە، باوجی وە شیوەیگ راستەخۆ کاریگەری لەبان ئاسایش تەندروسی گەلەیلمان و لەبان ئارامی دەوڵەت و کۆمەڵگا دیرێد.
دووپات کرد کە شیواشیو ژینگەیی و بەرزەوبوین پلەی گەرمی و کەمەوبوین سامانەیل ئاوی، گشت ئی کاریگەرییە بیماریەیل بڵاو کەێد، و زوور وەبان سیستەم تەندروسی زیای کەێد، و هەڕەشەی ئاسایش خوەراک و ئاو دەێد.
سەرۆک کۆمار وتیش؛ ئیمە لە عراق، لە ئاست حکومەت فیدراڵی و هەرێم کوردستان، پابەندیمن وە هاوبەشیلمان لە کۆمەڵگای ناودەوڵەتی ئەراک مینەکردن چارەسەریەیل وەردەوام و گورج ئەرا سەختیەیل ئاڵشتبوین کەشوهەوا.
وتیش: سەرکەفتن لە نواگیریکردن ئاڵشتبوین کەشوهەوا، رەنجەیل وەبڕ و هاوکاری و ناودەوڵەتی خوازێد، کە پشت وە زانست بەسێد، و سوود لە ئەزموون جەهانی گرێد.
سەرۆک عراق باس کۆنفرانس پاریس کرد کە وت: ئی کۆنگرە رۆڵیگ دیار دیرێد لە رینمایی تەقەلایل جەهانی وەرەو بانانیگ کەم کاربۆن، و ئی رێککەفنە چوارچیوەیگ هەمیشەیی پەیا کەێد کە هان دەوڵەتەیل دەێد ئەرا کەمکردن تەکانەیلی، و کارکردن وەیەکەو ئەرا کونجیان وەرد کاریگەرییەیل ئاڵشتبوین کەشوهەوا.
لەتیف وتیش: دووپات لە پابەندبوین عراق کەیمن وە بتەوکردن هاوکاری ناودەوڵەتی و کارکردن ئەرا گورجکردن تەمەیل رێککەفتن پاریس ئەرا وەجیهاوردن وەردەوامیی ژینگەیی و تەندروسی.