حەسەنی ئەرا ئاژانس شەفەق نیوز وت: "نرخ ئاڵشتکردن هویچ پەیوەندییگ وە پەسەنکردن بودجە نەیرێد، بەڵکم سیاسەتیگ دراوییە لە ئەرک بانک ناوەندیە، ک بڕیارە ریوشوینەیلی بوودە مدوو ئارامگردن نرخ دۆلار".

وتیش: خەرجەیل حکومەت وە پەسەنکردن بودجە نیەوودە مدوو داوەزین نرخ دۆلار، بەڵکم وە پیچەوانەو، ک خوازین دۆلار زیایەو کەێد، چوینکە حکومەت پویل نوو ئەرا فەرمانبەرەیل نوو خەرج کەێد، ک مووچەی کەڵەکەبوی زیاتر لە ٦ مانگە، و یەیش هیلێد  پویل فرەیگ داوەزێدە بازاڕ، ک ئیجا لە سەنین و هاوردە وە دۆلار ئاڵشت کریەێد چوینکە وڵاتەگە هویچ بەرهەمیگ نیشتمانی نەیرێد.

حەسەنی باس ئەوەیش کرد ک "بەشیگ لە بازرگانەیلییش، تا ئیسە دۆلار لە بازاڕ هاوتەریب ئەرا کار بازرگانییان سیننن، و ئەوان نەچینەسە بانک ئەرا دابینکردن دارایی ئی هاوردەکردنەیلە لەوەر بڕیگ هووکار، یەیش زوور خەێدە بان ئەو هاوردەکردنە لە بازاڕ و داوای دۆلار زیای کەێد.

 وتیش: "خەرج حکومەت وە پەسەنکردن بودجە وازەو بوود، چوینکە وەرجەیە وەمدوو پەسەننەکردن بودجەو وە خەرجکردنی یەک لەبان 12 سنووردار کریا و وەگەرد پەسەنکردنی ئەویش وازەو بوود، هەرلیوا خەرجکردنیش دیرێد، و بایەتە بەشیگی وە دۆلار دابین بکریەێد.

 جی باسە ک نرخ دۆلار وەرامبەر دینار عراقی زیاتر لە دوو دۆلار داوەزیا، وەگەرد نزیکبوین تەواوبوین پەسەنکردن بودجە لەلایەن پەرلەمان عراق، تا ئمڕوو یەکشەممە، بڕەسێدە ١٤٥٩٠٠ وەرانوەر ١٠٠ دۆلار، دویای ئەوەگ ١٤٧٩٥٠ دینار بوی وە بەراورد وە چوارشەممەی گوزەشتە.