شه‌فه‌ق نيوز/ عه‌دنان زورفى راسپارياگ ئه‌را دامه‌زرانن حكومه‌ت تازه‌ى عراقى، يه‌كه‌م گفتگوو وه‌ل فوئاد حسێن وه‌زير دارايى ساز كرد.
له‌ى باوه‌ته‌و، نويسينگه‌ى زورفى له به‌ياننامه‌يگ وت: له‌و ديداره زورفى باس له به‌رنامه حكوميه‌گه‌ى ئاينده‌ى و ديد سياسى و ئابوورى ئاينده‌ى وڵاته‌گه‌و چوينێتى چاره‌سه‌ركردن مه‌سه‌له‌يل ناونى حكومه‌ت ناوه‌ندى و حكومه‌ت هه‌رێم كردگه.
لاى خوه‌ييشه‌و، نويسينگه‌ى فوئاد حسێن وه‌زير دارايى له به‌ياننامه‌يگ وت: له‌و ديداره باس له باوه‌ته‌يل جوراوجوور كرياگه، له‌وانه‌يش به‌رنامه‌ى حكومى و چوينێتى روێ وه‌ڕوێ بوينه‌وه‌ى سه‌ختيه‌يل و باردوخ سياسى ناوخوه‌يى و هه‌ڵويست حزبه‌يل سياسى له مه‌سه‌له‌ى راسپاردن و ديد زورفى له باره‌ى چوينێتى مامڵه‌كردنى وه‌ل هه‌رێم كوردستان و ريه‌يل چاره‌سه‌ر كيشه‌يل ناونى حكومه‌ت ناوه‌ندى و هه‌رێم.
جى باسه له به‌ياننامه‌گه‌ى وه‌زير دارايى هاتگه فوئاد حسێن قه‌وڵ ئه‌وه داگه ديد زورفى بڕه‌سنێده سه‌ركردايه‌تى سياسى له كوردستان و نوێنه‌ر حززبه‌يل كوردستانى له هه‌رێم.