شەفەق نیوز- بەغداد

دەسەی دەسپاکی فیدراڵی، ئمڕوو دووشەممە، خەوەردا لە دەرچگن بڕیار وە زیندانیکردن ئەرا ماوەی هەفت ساڵ وەرانوەر وەڕێوەبەر گشتی کۆمپانیای بەشەوکردن کارەبای ناوڕاس لە وەزارەت کارەبا؛ لەباوەت "تاوان دەسکەفت نایاسایی"، لە شان پابەندکردنی وە گلەوداین بڕ (25.7) ملیار دینار کە نۊنەرایەتی بڕای دەسکەفت نایاسایی و سزای دارایی کە هاوتای کەێد.

 دەسەگە لە بەیاننامەیگ رەسیە ئاژانس شەفەق نیوز وت، کە دادگای تاوانەیل نواگیریکردن گەندەڵی ناوەندی بڕیار وە زیندانیکردن ئەرا ماوەی هەفت ساڵ لەبان تاوانبارکریاگ (عەلا سەمیر راشد)، وەڕێوەبەر گشتی کۆمپانیای بەشەوکردن کارەبای ناوڕاس لە وەزارەت کارەبا دەرکرد؛ لەبان بنەمای فەرمانەیل مادەی (19/دۊیەم) لە یاسای دەسەی دەسپاکی و دەسکەفت نایاسایی شمارە (30 ئەرا ساڵ 2011) هەموارکریاگ.

هەمیش وت کە دادگاگە بڕیار دا وە پابەندکردن تاوانبارکریاگ وە گلەوداین بڕای دەسکەفت نایاسایی کە رەسێدە (5,524,135,000) پەنج ملیار و پەنجسەد و بیس و چوار ملیۆن دینار عراقی، و (5,538,593) پەنج ملیۆن و پەنجسەد و سی و هەشت هەزار دۆلار ئەمریکی، وەگەرد چەسپانن سزایگ دارایی لەبانی کە هاوتای بڕای دەسکەفت نایاساییە، وەپای مادەی (19/چوارەم) لە یاسای دەسەگە.

 دەسەگە دیاری کرد کە بڕیار فەرمانەگە دووپاتکردن دەسناین وەبان ئەو سامانەیل گواستریای و نەگواستریایە ئەرا تاوانبارکریاگ لەخوەی گرد، وەگەرد داین ماف وە دەسەی دەسپاکی فیدراڵی ئەرا داواکردن قەرەبووکردن لەباوەت زەرەدەیل، دۊای ئەوەگ بڕیار فەرمانەگە پلەی بڕیاگ وەرگرێد.