شەفەق نیوز/ دادگای تاوانەیل ناسڕیە لە پارێزگای زیقار، ئمڕوو چوارشەممە، سزای زیندانیکردن تونیگ ماوەی دوو ساڵ ئەرا چوارکەس دەرکرد کە سەر وە "کۆمەڵەی قوربانن".

سەرچەوەیگ ئەمنی وە ئاژانس شەفەق نیوز وت، بڕیارەگە لەدویای چەسپانن ئەوەگ ئەو چوارکەسە پەیونی وە کۆمەڵەی لەڕیدەرچگ قوربان دیرن هاتییە، وە  توومەت سوکایەتیکردن وە هێمایگ ئایینی کە لەلایەن مەزهەبیگ ئایینیەوە رێز لەلیگرێد، سزا دریانە.

وتیش، بڕیارەگە وە پشت بەسان وە مادەی  372 لە یاسای سزادان عراقی شمارە 111 ساڵ 1969 هاتیە.

هێزە ئەمنیەیل عراق توەنستنە دە کەس دەسگیربکەن لە ئەندامەیل کۆمەڵەگە لە پارێزگایەیل واست و بەسڕە و موسەنا و دیوانییە، لەدویای ئەنجامدان کارەیل تونڕەوی لەناوی تەقەلای خوەیکوشتن.

 کۆمەڵەگە لەوباوەڕەن ئیمام عەلی کوڕ ئەبی تالیب خوداس، هەمیش ریورەسم تیروپشک لەناو ئەندامەیلی پەیڕەوکرێد ناو هەر کەسیگ دەربچوود کرێدە قوربان ئیمام عەلی.

کۆمەڵەی "قوربان" لە عراق قەیەغەس، دەستوور و یاسایەیل عراق ئەندامێتی لەو گروپەیلە وە تاوان زانن کە بیرۆکەی توندڕەو وەرەونوابەن یا  داوای توندوتیژی کەن.