شەفەق نیوز- بەغداد

دەزگای دەسپاکی فیدراڵی، رووژ یەکشەممە، خەوەردا لە دەرچگن دوو بڕیار زیندانیکردن ئەرا 7 ساڵ وەبان هەر یەک لە پەرلەمانتار وەرین تەڵاڵ زوبەعی، و جینشین وەزارەت نەفت ئەرا کاروبار بەشەوکردن عەلی معارچ بەهادلی، لەبان تاوان ئاوسان پۊل و قازانج نایاسایی.

دەزگاگە لە بەیاننامەیگ کە رەسیە ئاژانس شەفەق نیوز دیاری کرد، کە بڕ قازانج نایاسایی و ئاوسان لە پۊل تاوانبار تەڵاڵ زوبەعی رەسیەسە نزیکەی 35 ملیار دینار، وەپای ئەوەگ لێکۆڵینەوەیل لە دۆسیەگە رەسینەسە پی.

وتیش کە بڕیارەگە زوبەعی پابەند کردگە وە داین نزیکەی 70 ملیار دینار، کە گلەوداین بڕ قازانج نایاسایی کە رەسێدە نزیکەی 35 ملیار دینار لەخوەی گرێد، لەشان سزایگ دارایی وە خود ئەو بڕە.

 وەی جۊرە، بڕ ئەو بڕە پۊلەیلە کە بڕیارەگە تاوانبارەگە پابەند کردگە وە داینیان رەسێدە نزیکەی 70 ملیار دینار، بیجگە لە سزای زیندانیکردن ئەرا ماوەی هەفت ساڵ لەبان تاوان ئاوسان پۊل و قازانج نایاسایی.

لە بڕیاریگ ترەک، دەسپاکی دووپات لە زیندانیکردن هەفت ساڵ لە بان عەلی معارچ کرد، دیاری کرد کە نزیکەی (26.5) ملیار دینار بڕ قازانج نایاسایی و ئاوسانە لە پۊل تاوانبارەگە.

 دەزگاگە باس پابەندکردن تاوانبارەگە کرد وە داین بڕ (53) ملیار دینار، کە ئەویش نوێنەرایەتی بڕ قازانج نایاسایی و ئەو سزای داراییە کەێد کە هاوتایەتی.