شەفەق نیوز/ سەرچەوەیگ ئەمنی لە پارێزگای زیقار، ئمڕوو سێشەممە، خەوەردا لە توومارکردن چەن رویداویگ ئەمنی لە پارێزگاگە، لەلیان ٣ تەقەلای خوەیکوشتن بویە.   

سەرچەوەگە ئەرا ئاژانس شەفەق نیوز وت: دوو پیاو و دویەتیگ لەناوچویلیگ جیاجیا لە زیقار، وە ئاگر و ژەهر مویش خوەیان کوشتنە، باوجی گشت تەقەلایلیان شکست هاورد، هەناێ کەسوکارەیلیان توەنستن رزگاریان بکەن. 

سەرچەوەگە وتیش: کەسیگ مەوقەی پاکەوکردن چەکەگەی وەنەزانستنی گولە داگە لە ژن سوری خوەی، ک ژنە زەخمدارەگە ئەرا خەسەخانەی تورکی بریا. 

سەرچەوەگە وتیش: مرافەیگ چەکدار کەفتە ناوبەین دوو بڕ لە گەڕەک تەلیعە لە شار ناسریە، رەسیە کەفتن ٤ زەخمدار، یەکیگیان زەخمەگەی سەختە، وتیش: مرافەگە لەبان خاسەوکردن یەکیگ لە ماشینەیل بویە.  

وتیش: پەلاماردەرەیل وەرەو شوینیگ نادیار واینە.

 سەرچەوەگە دیاری کرد ک قەواسوی ماڵیگ کەفتە بان کەسەیلیگ لەناوچەی حەی سناعی ناوڕاس پارێزگاگە، بویە هووکار زەخمداری ٣ کەس لەناو ماڵەگە.