شەفەق نیوز- بەغداد
عەلی فالح زەیدی، سەرۆک وەزیرەیل، ئمڕوو دووشەممە، رێنمایی دا وە ئەوەگ کار کۆمپانیایەیل نەفتی وە دریژایی 24 سەعات بوود، وە جۊریگ زامن وەردەوامبۊن پرۆسەیل بەرهەمهاوردن و هەناردە و زیایکردن ریژەیەیلیان بکەێد، لە سای داوەزین گەورەیگ لە هەناردنەیل نەفت عراقی وە مدوو بەسانن گەروو هورمز.
زەیدی، لەناو گردەوبوینیگ فراوان ئەرا وەزارەت نەفت، وەپای بەیاننامەیگ کە رەسیە ئاژانس شەفەق نیوز، دووپات لەبان گرنگی پەلەکردن لە پەیاکردن چارەسەرەیل کردەیی ئەرا رەفتارکردن وەگەرد لێکەفتەیل قەیرانەگە کرد، لەڕی خاسەوکردن و پەرەپیداین لویلەیل کلکردن نەفت، و بەسانن گربەبەس وەگەرد کۆمپانیایەیل جەهانی ئەرا خستنەبازاڕ و فرووشتن نەفت عراقی.
دووپات کرد لەبان هەوەجەی قایمکردن دەروازەیل هەناردەی جیگر، و دەسنشان ئەرا ئەوە کرد کە وەزارەت نەفت خاوەن فرەیگ لە چارەسەرەیل و دەرفەتەیلە کە تۊنریەێد کار لەبانیان بکریەێد وە شیوەیگ پەلە، وە جۊریگ ئەنجامەیل زویوەزوی و وەرچەو وەدەس بارێد.
زەیدی رێنمایی وە بەرهەمهاوردن رەوشەیل ئیسە دا و ئاڵشتکردن قەیرانەگە ئەرا دەرفەتیگ ئەرا سەرکەفتن، لەڕی پەرەپیداین ژیرخانەیل نەفتی و فراوانکردن دەروازەیل هەناردن.
یەیش لەناو گردەوبوینیگ فراوان ئەرا وەزارەت نەفت رۊ دا، وە ئامادەبۊن هەردوگ وەزیرەیل دارایی و نەفت، و وەڕێوەبەر نووسینگەی سەرۆک ئەنجومەن وەزیرەیل، و بریکارەیل و وەڕێوەبەرەیل گشتی لە گشت فەرمانگە و پێکهاوردنەیل وەزارەتەگە، کە چەوەخشانن کریا ئەرا ئەو پلان و ستراتیژیەیلە کە وەزارەتەگە ئامادەیان کردگە و میکانیزمەیل مامەڵەکردن وەگەرد لیکەفتەیل قەیران گەروو هورمز و چارەسەرە پێشنیارکریاگەیل ئەرا زامنکردن گونجیان هەناردن نەفت عراقی و زیایکردن توانایەیل هەناردنیی.
دیدارەگە هەمیش باج و باس و راسی کەرت نەفتی و ئاستەیل بەرهەمهاوردن و هەناردن وەخوەی دی لە سای ئەو رەوشە نائاساییەیلە کە ناوچەگە وەخوەیەو دۊنێد، و ئەوەگ لەلی کەفتەو لە بەسانن گەروو هورمز و داوەزیان ریژەیل هەناردن نەفت عراقی، لەشان باج و باس سیاسەت و پلانەیل و چارەسەرەیل گونجیاگ ئەرا زامنکردن وەردەوامبۊن هەناردن و قایمکردن دەروازە جیگرەیلی.