شەفەق نیوز - کەرکووک

سەرچەوەیگ ئەمنی، رووژ دوشەممە، خەوەردا لە زەخمداربۊن 3 گەنج، لە رویداوەیل جیاجیا کە پارێزگای کەرکووک وەخوەیەو دی.

سەرچەوەگە ئەرا ئاژانس شەفەق نیوز وت، کە گەنجیگ کە تەمەنی رەسێدە 27 ساڵ، کە خاوەن نویسینگەی عەقاراتە، تویش تەقەکردنیگ هات لە ری بازنەیی لە شار کەرکووک، لە وەختیگ گەنجیگ ترەک، کە تەمەنی رەسێدە 22 ساڵ، تویش زەخمەیل سەختیگ هات لەوەر چەقووکیشان لە نزیک پیەڵ عەلی عەسکەری.

وتیش کە فەرمانەیل دادوەری دەرچگنە ئەرا دەسگیرکردن تومەتبارەیل لە هەردوگ رویداوەگە، ئەرا تەواوکردن ریکارە یاساییەیل.

 لە رویداویگ جیا سەرچەوەگە دووپات کرد، کە گەنجیگ کە تەمەنی رەسێدە 19 ساڵ تویش گولەیگ هاتگە لە ناوچەی رەحیم ئاوا، لە وەختیگ لە وتەگەی لە وەرانوەر پۆلیس باس لەوە کرد کە گولەگە لە چەکیگ کە لە دەسی بۊە وە هەڵە دەرچگە.