شەفەق نیوز/ دوو سەرچەوەی ئەمنی، ئمڕوو چوارشەممە، خەوەردان لە دروسبوین مەرافەیل تونیگ لە ئەنجا  شمارەیگ کەس زەخمداربوین و دەسگیرکریان لە بەغدای پایتەخت و شار موسڵ.

سەرچەوەیگ ئەمنی وە ئاژانس شەفەق نیوز وت "مەرافیگ لەناوەین شمارەیگ کەس دروسبویە لە ناوچەی مەعامل خوەرهەڵات بەغدای پایتەخت و چەقوو وەکارهاوردنە لە ئەنجام دوو کەس تویش زەخمداری جوراوجویر هاتنە".

سەرچەوەگە دیاریکرد "مەرافەگە هووکارەگەی لە گیچەڵ کەسیەوبویە لەو باوەڕەین پەیوەنی وە مەرافکردن لەبان ژن بوود" دووپاتکرد "دەزگایەیل ئەمنی لێکۆڵینەوە لە رویداوەگە وازکردنە تا رێکار یاسایی پێویست بگرنەوەر".

لەرویداویگ جیا، سەرچەوەی ئەمنی ترەک وە ئاژانس شەفەق نیوز وت "هەفت کەس تویش زەخمداری جیاوازهاتن  وە مدوو وردەوردە تا رەسیەس ئەرا جەنگ سەختیگ و هەردووگ لا کەرەستەیل تیژ وەکارهاوردن کە خەڵک یەک ئیڵن لەناوچەی پیشەسازی کەرامەت خوەرهەڵات موسڵ".

ئاشکرایکرد "هێزەل پۆلیس وە خێرایی رەسینەس و توەنستنە کۆنترۆل بارودۆخەگە بکەن گشت لایەنەیل دەسگیربکەن سەرەرای زەخمداربوینیان، وەپای فەرمانیگ دادوەری،" وتیش "هێزەیل ئەمنی ئەرا چارەسەرکردن زەخمدارەیل کلکردنەسە خەسخانە".