شەفەق نیوز/ سەرچەوەیگ ئەمنی لە پارێزگای زیقار، ئمڕوو یەکشەممە، خەوەردا لە قومیان مرافەیگ هووزانە لە باشوور پارێزگاگە، ک رەسیە وەکارهاوردن مووشەک لەناوی.

سەرچەوەگە ئەرا ئاژانس شەفەق نیوز وت: ناحیەی گورمەت بەنی سەعدد باشوور پارێزگای زیقار، قومیان مرافەیگ هووزانە وەخوەی دی، ک مووشەک ئاربیجی لەناوی وەشیا، ئەوەیش لەوەر توڵەسەنین هووزانەی کویەنەیگ.

سەرچەوەگە دیاری کرد ک هویچ کەسیگ لە مرافەگە زەخمدار نەوی، و زەرەدەیلیگ دارایی وەماڵ کەسیگ لە لایەنەیل مرافەگە توومار کریا.

لە قەزای شەترە، باکوور زیقار، دەزگا ئەمنیەیلە زەخمداری ژنیگ لەناو تەمەن پەنجایلە لەناو ماڵەگەی خوەی وە گولەی ویڵیگ لە سینەی توومار کردن.

لە قەزای ئیسڵاح خوەرهەڵات پارێزگاگە،  مرافەیگ چەکدار لەبان ئاژەڵ کەفتە ناوبەین دوو کەس، وتیش؛ مرافەگە رەسیە زەخمداری یەکیگیان وە گولە، و ئەوەکە وەرەو شوین نادیاریگ وای.