شەفەق نیوز/ سەرچەوەیل ئەمنی، ئمڕوو چوارشەممە، خەوەردان لە زەخمداری 4 مەدەنی وە رویداو هاتوچوی لە پارێزگای کەرکوک و پۆلیس چەن کەسیگ دەسگیرکەێد کە پەلامار ماڵ راگەیانکار دانە کە لە کەناڵیگ فەرمی کارکەێد.
سەرچەوەیگ لە هاتوچوی کەرکوک وە ئاژانس شەفەق نیوز خەوەردا، " ماشینیگ لە جویر (مارسیدس جی کلاس) رانندەگەی کۆنترۆل لەدەسدایە لە دەروازەی پارێزگای کەرکوک لەلای باشوور وە ئاراستەی ناحیەی تازە پلیایە و بویە مدوو رویداویگ کە زەرد مادی رەسانە ماشینەگە و رانندەگە زەخمداربوی و ئەرا چارەسەر کلکریاس خەستەخانە" وتیش "بڕ پویل ماشینەگە نزیکەی 100 هەزار دۆلارە".
سەرچەوەگە دووپاتکرد "لەرویداویگ ترەک لەبان ری دوزخورماتوو ـ کەرکوک رویدایە لەناوەین دوو ماشین زەرد مادی وە دوو ماشین رەسیە و سێ مەدەنی زەخمداربوینە و ئەرا خەستەخانە کلکریانە".
سەرچەوەیگ لە پۆلیس کەرکوک، خەوەردا لە دەسگیرکردن چوارکەس کە توومەتبارن وە پەلاماردان ماڵ راگەیانکاریگ کە لە کەناڵیگ فەرمی کارکەێد.
سەرچەوەگە وە ئاژانس شەفەق نیوز وت، "فەرماندەیی پۆلیس کەرکوک توەنستیە چوارکەس دەسگیربکەێد کە پەلامار ماڵ راگەیانکار تورک موراد مورادلی دانە کە لە کەناڵ عراقیە تورکمانیە سەر وە تووڕ راگەیانن عراقی کارکەێد".
وتیش" لەدویای وازکردن لێکۆڵینەوە و وەدویاچگن ئەرا کامیرایل چەودێری توومەتبارەیل دەسگیرکریان".