شەفەق ئمڕوو/ ١١٠ پەنابەر لوبنانی، دویای تەواوکردن ریکارەیل گلەوخواردنیان ئەرا وڵاتیان، ماڵئاوایی لە پارێزگای بابل کردن. 

پەیامنێر ئاژانس شەفەق نیوز وت: ئەو ئاوارەیلە کە پەنا و عراق بردن لە دەستی جەنگ و گورزەیل ئیسرائیل وەبان لوبنان وەرجە چەن مانگیگ، سوار پاسەیل بوین وەرەو فرۆکەخانە وە کاروان گلەوخواردن.

عراق وازکردن شنوو ئاسمانی و هشکایی لەڕوی ئاوارەیل لوبنانی راگەیان، کە لە جەنگ ئیسرائیل و حزبوڵا واینە.

لە 25 ئەیلوول گوزەشتە، یەکەم بڕ زەخمدار و ئاوارەیل رەسیە فڕوکەخانەی ناودەوڵەتی بەغدا، کە لەو وەختە سەرچەوەیگ لەناو فڕوکەخانە ئەرا ئاژانس شەفەق نیوز وت: ناوەین 50 تا 70 زەخمدار لوبنانی رەسینە بەغداد وەرد کەسەیل باوەڕیان ئەرا وەرگردن چارەسەری لە خەسەخایل عەتەبەی حوسەینی.

لە کۆتایی مانگ گوزەشتە، وەزارەت کووچ و کووچبەری عراق گلەوخواردن چین دویەم لە لوبنانیەیل ئەرا وڵاتیان راگەیان، ئەوەیش لەسای ئاگربەسی ناوەین ئیسرائیل و حزبوڵا.

  وەگورەی مەزەنەیل عراقی فەرمی، شمارەی پەنابەرەیل لوبنانی لە عراق لە وەخت رەسین هیزەیل ئیسرائیل ئارا باشوور لوبنان، و گورزەیل ئاسمانی وەرجە ئەوە، رەسیەسە زیاتر لە 20 هەزار کەس.