شەفەق نیوز - بەغداد

روانگەی "عراق سەوز" ژینگەیی، ئمڕوو چوارشەممە، زیانە کشتوکاڵییەیل وە زیاتر لە ملیاریگ دۆلار مەزەنە کرد لەوەر هشکەساڵی و شەپۆلەیل گەرما و کەمئاوی، و لە خود وەخت دووپات کردە بان کاریگەری ئەوە لەبان ئاسایش خوەراک و ئابووری نیشتمانی لە وڵاتەگە.

روانگەگە لە راپۆرتیگ کە رەسیە ئاژانس شەفەق نیوز دیاری کرد، کە عراق کەفتە وەر زیانەیل کشتوکاڵی لە ماوەی ساڵەیل گوزەشتە کە مەزەنە کریەێد وە ملیاریگ و 100 ملیۆن دۆلار، وە دیاریکردن ئەوە کە کەمئاوی یەکیگ بۊە لەو هووکارەیلە کە بۊنەسە هووکار دەرچگن نزیکەی نیمەی زەۊە کشتوکاڵییەیل لە عراق لە بەرهەمکاری و جیوەجیکردن لە ماوەی وەرزە سەختەیل، لە شان لەدەسداین ساڵانەی سەدان هەزار لە دۆنمە شایستەیلە ئەرا کشتوکاڵ.

دیاری کرد کە راپۆرتە فەرمی و ناودەوڵەتییەیل نشان دەن کە بیاوانبۊن هەڕەشە کەێد یا ریژەیگ فراوان لە زەۊە شایستەیل ئەرا کشتوکاڵ قۊت داگە لەئەنجام کەمەوبۊن پووشین رووەکی و کەمبۊن وارانەیل، وە دووپاتکردن ئەوەگ کۆمەڵگەیل ئاوایی و ئاژەڵدارەیل وە تونی زەرەدمەن بۊنە، وە شیوەیگ کە فرەیگ لە ئاژەڵدارەیل ناچار بۊنە ئەرا فرووشتن یا لەدەسداین شمارەیگ گەورە لە ئاژەڵەیلیان لەوەر مردارەوبۊنیان وە تینگی و ورسگی و سویەری ئاوەگە.

 روانگەگە دووپات کرد کە کەمەوبۊن ئاست ئاو چەمەیل بۊسە هووکار تیکەڵبۊن زوان سویەری و پشت بەسین جفتیارەیل وە بیرەیل ژیر زەۊ فرە سویەر، ئەوەگ بۊسە هووکار کەمەوبۊن بەرهەمداری خاکە دەشتییەگە ئەرا ئاستەیل فرە نزم.

راپۆرت روانگەگە وەردەوام بۊ، کە ئی قەیرانە یەک لەدۊای یەکەیل کاریگەری کردنەسە بان ئاسایش خوەراک و عراق ناچار کردنە لە چەن وەرزیگ لەبان کەمەوکردن پلانە کشتوکاڵییە وەرزەییەیل وە شیوەیگ تون و پشت بەسین زیایبۊیگ لەبان هاوردەکردن خوەراک، ئەوەگ زووریگ زیاتر لەبان ئابووری نیشتمانی دروس هاوردگە.