شەفەق نیوز - بەغداد

روانگەی ژینگەیی "عراق سەوز"، ئمڕوو یەکشەممە، دووپات کرد لە وەردەوامبۊن پیسبۊن هەوا لە بەغداد لەوەر ریکارە بێسوودەیل لایەنە پەیوەندیدارەیل وە دۆسیەی چالاکییە سەرپێچیکەرەیل لە پێوەرە ژینگەییەیل لە پایتەخت، وە وەسفکردن لێدوانە فەرمییەیل لەباوەت وسانن ئەو چالاکییەیلە وە ئەوەگ "راس نین".

روانگەگە لە نووترین راپۆرت خوەی دیاری کرد، کە پیسبۊن لە بەغداد لە چەن مانگیگەو وەردەوامە، و لە ماوەی رووژەیل دویایی خراوترەو بۊە لەوەر چالاکییە سەرپێچیکەرەیل لە پێوەرە ژینگەییەیل، وە تایوەت کارگەیل خشت و قیر، وە ئاماژەداین ئەرا بۊین نزیکەی 8 هەزار چالاکی لە پایتەخت کە پابەند نین وە پێوەرە ژینگەییە فەرمییەیل.

زیایش کرد کە گشت ئەو لێدوانەیلە کە لایەنە پەیوەندیدارەیل لەباوەت بەسانن چالاکییە سەرپێچیکەرەیل ژینگە داۊنە راس نەۊن، وە بەڵگەی وەردەوامبۊن پیسبۊن لە بەغدای پایتەخت و دریژەوبۊنی تا کاریگەری بکەێدە بان پارێزگا نزیکەیل لەلی.

راپۆرتەگە هەمیش وت کە 48 وێستگە ئەرا چەودیاریکردن هەوای دەورگرد هەن کە بەشەو کریانەسە بان 11 پارێزگا ئەرا چەودیاریکردن و پەیمانەکردن پیسکەرە سەرەکییەیل هەوا، جۊر غازەیل و تەنۆلکە هەڵواسیاگەیل و تەپوتووز و ئاوێتە ئەندامییە هەڵچگەیل هایدرۆکاربۆنات، وە سەرنجداین وەرەو ئەوەگ کە ئی وێستگەیلە تۊش پەککەفتنەیل لەناکاو تیەن کە توانایان ئەرا دابینکردن ئەنجامەیل لە دریژایی ساڵ پەک خەن.

روانگەگە ئاشکراش کرد کە زەرەدمەنترین ناوچە وەی پیسبۊنە کۆمەڵگەی نیشتەجێبۊن بسمایەس، کە بڕیار بۊ کۆمەڵگەیگ نموونەیی بوود دۊر لە قەرەباڵغی و دەنگەدەنگ، بەڵکم نزیکی کارگەیل خشت و قیر لەلی کردیەسەی پیسترین کۆمەڵگە لە پایتەخت.

راپۆرتەگە هوشداریش دا لە رخباریەیل دیاردەی تێکەڵبۊن ئاو دیجلە وەرد ئاو ئاوەڕۆ لە چەم دیالە لە ماوەی وەرز زمسان وەرد وارین واران خەس، و ئەوەگ لەلی کەفێدەو لە بڕیان ئاو لە کۆمەڵگەی بسمایە و ناوچەیل شانی.

روانگەگە داوایش کرد ئەرا ئەنجامداین ریکارەیل خێرا لە دژ چالاکییە سەرپێچیکەرەیل، وە هوشداریداین لەوەگ بەرزەوبۊن پیسبۊن هەوا بوودە هووکار زیایبۊن جەڵتەی مەژگ و دڵ و بەرزەوبۊن پەستان خۊن و نۆرەیل تەنگەنەفەسی، بیجگە لە رۆڵی لە مەودای دۊر لە زیایکردن تۊشبۊنەیل شێرپەنجەیی، وە دووپاتکردن ئەوەگ بەغداد بۊەسە یەکیگ لەو ناوچەیلە کە ژینگەیگ ناتەندروس دیرن ئەرا چینە ناسکەیل جۊر مناڵەیل و وەساڵاچگەیل و ژنەیل دووگیان و نەخوەشەیل.