شەفەق نیوز- بەغداد
روانگەی "عراق سەوز" تایبەتمەن وە کاروبار ژینگە، رووژ سێشەممە، ئاشکرا کرد کە 4 فەرمانگەی حکومەتی بەشداری لە ماڵین باخەیل و ریگری لە نواگیریکردن بیاوانبۊن لە وڵاتەگە کردنە.
روانگەگە لە بەیاننامەیگ رەسیە ئاژانس شەفەق نیوز، دیاری کرد کە بەشیگ لە وەزارەتەیل رێکارەیلیگ گردنەسە وەر کە ماڵین رووبەرەیل فراوانیگ لە زەوییە کشاوەرزییەیل و لاوردن شمارەیگ لە دارەیل لەخوەی گرێد، پێچەوانەی یاسای پارێزگاری و خاسەوکردن ژینگە کە بڕین دارە کۊنەیل لە ناوچە گشتییەیل لەناو شارەیل قەیەغە کەێد مەگەر وە موڵەت لە سەرۆک ئەنجومەن پارێزگاری و خاسەوکردن ژینگە لە پارێزگاگە، و پێچەوانەی بڕیار ئەنجومەن وەزیرەیل کە وەزارەتەیل ئاوەدانکردن و نیشتەجیکردن و کشاوەرزی و پارێزگایەیل پابەند کرد وە جیوەجیکردن رێکارەیل مسۆگەرکەر ئەرا وسانن ماڵین باخەیل و زەوییە کشاوەرزییەیل و ریگریکردن لە ئاڵشتکردنیان ئەرا زەوییەیل نیشتەجیبۊن یا ئاڵشتکردن وەکارهاوردنیان ئەرا مەبەسەیل تر وەگەرد ریداین وە ئاڵشتکردن رەگەزیان.
روانگەگە زیاتر وت کە کۆمپانیای گشتی ئەرا جیوەجیکردن پرۆژەیل گواستنەوە و رەسانن لە وەزارەت گواستنەوە گرێبەستیگ بەرهەمهاوردن دریژماوە وەگەرد کەرت تایبەت واژوو کردگە ئەرا دروسکردن ئەممارەیل فرە مەبەس لەبان یەکیگ لە باخەیل لە بەغدای پایتەخت، کە لەی وەخت ئیرەنگە چنریاگە و بەشە ئاویگ ئەرا خوەی دیرێد، و دامەزرانن ئی پرۆژە بوودە مدوو شیویان بەرهەمەیل و لاوردن نەمامەیل.
روانگەگە دووپات کرد کە فەرمانگەی ریوبان و پیەڵەیل لە وەزارەت ئاوەدانکردن و نیشتەجیکردن و شارەوانییەیل گشتی نەخشەی رییگ کە وەرەو شار عەلی وەردی لە ناوچەی نەهرەوان لە بەغداد چوو پێشنیاز کردگە، کە دیاری کریاگە ئی ریە وەگەرد فرەیگ لە پرۆژە کشاوەرزی و ئاویارییەیل دژ یەکە، ئەوەیش بوودە مدوو شیویان شمارەیگ گەورا لە باخەیل و زەوییە کشاوەرزییەیل و ماڵە نیشتەجیبۊنەیل ئەرا کشاوەرزەیل.
روانگەگە دیاری کرد کە سەنتەر نیشتمانی ئەرا وەڕێوەبردن سەرچەوە ئاوییەیل لە وەزارەت سەرچەوە ئاوییەیل ئامادەکردن لێکۆڵینەوەیل تایبەت وە بیاوانبۊن و مدووەیلی و لیکەفتەیل نەرێنی کەمبۊن ئاستەیل چەمەیل و کەمەوبوین رۊبەرە ئاوییەیل لەبان کشاوەرزی و دارچانن و زیایبۊن دیاردەی بیاوانبۊن پشتگووش خستگە.
باس بۊین لاوازییگ لەو رێکارەیلە کرد کە لەلایەن وەزارەت کشاوەرزی و وەزارەتەیل و فەرمانگەیل تر پەیوەندیدار گیرانەسە وەر لە کەمەوکردن زیایبۊن رخ دیاردەی بیاوانبۊن، ئەوەیش بوودە مدوو زیایبۊن لیکەفتەیل نەرێنی ئاڵشتکارییەیل کەشوهەوا لەبان ژینگە، بیجگە لەو رخە کە ئی دیاردە لەبان ئاسایش خوەراک و فرەجۊری زیندەوەری درێد.