شەفەق نیوز - بەغداد

روانگەی "ئیکۆ عراق" تایبەتمەن وە کاروبار ئابووری، ئمڕوو یەکشەممە، خەوەردا کە عراق هەوەجە وە زیاتر لە 10 هەزار مەکتەو نوو دیرێد ئەرا چارەسەرکردن قەرەباڵغی لەناو پۆلەیل و وەدیهاوردن ژینگەیگ فێرکاری خاستر، دياری کرد کە وەردەوامبۊن بویین نزیکەی 200 مەکتەو خەڕگین کە خوەنەوارەیل چنە ناویان.

 روانگەگە، لە بەیاننامەیگ کە رەسیە ئاژانس شەفەق نیوز وتیش کە "سمارەی ئەو مەکتەوەیلە کە خوەنەوارەیل لە عراق چنە ناویان لە 40 هەزار مەکتەو رەد کەێد، باوجی ئی شمارە هێمان بەس نییە ئەرا وەجیهاوردن هەوەجەی راسگانی".

هەمیش وت "عراق هەوەجە وە نزیکەی 8 هەزار مەکتەو نوو دیرێد ئەرا ئاڵشتکردن وەرەو سیستەم دەوام تاک، تا هەر وەڕێوەبەرایەتییگ مەکتەو باڵەخانەیگ سەروەخوەی بگرێدە دەس"، و دیاری کرد کە "چارەسەرکردن قەرەباڵغی لەناو پۆلەیل و وەدیهاوردن ژینگەیگ فێرکاری خاستر هەوەجە وە دروسکردن زیاتر لە 10 هەزار مەکتەو نوو دیرێد".

و وەپای روانگەگە، هێمان نزیکەی 200 مەکتەو خەڕگین و 800 مەکتەو کەرڤانەیی هەس، کە خوەنەوارەیل لە هەردوگ پارێزگای سەڵاحەدین و زیقار چنە ناویان، وتیش کە "ئەو پارێزگا و شارەیلە کە فرەترین خەسی دانیشتگەیل دیرن، چۊ بەغداد و موسڵ و بەسرە و زیقار، وە یەکیگ لەو ناوچەیلە هەژمار کریەن کە فرەترین هەوەجە وە دروسکردن مەکتەوەیل نوویگ دیرن".

 روانگەی "ئیکۆ عراق" لە کووتایی  باس گرنگی ئەوە کرد کە وەزارەت پەروەردە جدی بوود لە چارەسەرکردن قەرەباڵغی و خاسەوکردن باڵەخانە مەکتەوییەیل.