شەفەق نیوز- بەغدا

وەزارەت پەروەردە، ئمڕوو یەکشەممە، دیاریکردن وادەیگ نوو ئەرا دەسکردن ساڵ خوەنستن ڕاگەیەن.

وەزارەتەگە لە بەیاننامەیگ وەت: رووژ یەکشەممە کە کەفێدە 4 تشرین یەکەم دیاری کریا وە وادەی دەسکردن ساڵ نوو خوەنەواری، لەجیاتی وادەی دیاریکریاگ لە یەکەم مانگەگە، لەسەر باکگراوەند بڕیار ئەنجومەن وەزیران ئەرا پشوو فەرمی لە چوارشەممە 30 ئەیلوول تا شەممە 3 تشرین یەکەم، وە بۆنەی "رووژەیل سەروەری" ئەرا کۆمار عراق.

وەزارەت پەروەردە لە 9ی ئاب/ هەشت 2026 رووژ یەکشەممە 20 ئەیلوول/ سێپتەمبەر دیاری کردوێد وە وادەی دەسوەپیکردن دەوام خوەنەوارەیل، لە وەختیگ کە یەکەم ئەیلوول/ سێپتەمبەر دیاری کرد ئەرا دەسوەپیکردن کار کادرەیل فێرکاری و مامووستایەیلی، و داوا لە وەڕێوەبەرایەتییەیل گشتی ئەرا پەروەردە کرد ئەرا تەواوکردن ئامادەکارییلیان وەپای خشتەی راگەیەنریاگ، باوجی وادەگە فرە وەردەوام نەبوی.

لە 15 ئەیلوول/ سێپتەمبەر، وەزیر پەروەردە عەبدولکەریم عەبتان ئەلجبووری تەمێ دا وە دویاخسن دەسوەپێکردن ساڵ خوەنین ئەرا یەکشەممە 11 تشرین یەکەم/ ئۆکتۆبەر ئاینده لەجیاتی 20 ئەیلوول/ سێپتەمبەر، ئەرا  دەرفەت دان وە تەواوکردن رێکارەیل تاقیکردنەوەیل خول دویەم ئەرا پۆلەیل ناکۆتا و ئامادەکردن مەکتەوەیل، وەگەردی دیاریکرد ئەرا بەرزەوبوین پلەی گەرمی و تەواوکردن هەوەجەیل مەکتەو و تەکنیکی و ئیداری.

دویای دوو رووژ تەنیا، وەزارەتەگە گلەو خوارد ئەرا دەستکاریکردن وادەگە دوارە، وە راگەیانن نواخسن دەسوەپیکردن  دەوام ئەرا 1 تشرین یەکەم/ ئۆکتۆبەر ئاینده، و وت کە بڕیارەگە دویای تەواوکردن ئامادەکارییلی و ئامادەکردن مەکتەوەیل و هەوەجەیل فێرکاری و ئیداری پێویست ئەرا پێشوازیکردن لە خوەنەوارەیل هات، لە وەختیگ کە وەزیرەگە تەمێ دا وە وەڕێوەبەرایەتییەیل گشتی ئەرا پەروەردە وە گردن رێکارەیل پێویست ئەرا جیوەجیکردن وادە نووەگە.