شەفەق نیوز - دیالە

سەرچەوەیگ حکومی، ئمڕوو شەممە، ئاشکرای توومارکردن رمانن لە نزیکەوبۊیەیل پیەڵ حەمرین کرد، کە وە دریژترین لە عراق هەژمار کریەێد، لەوەر بەرزەوبوین ئاستەیل دەرياچەگە.

 سەرچەوەگە ئەرا ئاژانس شەفەق نیوز وت: شاندیگ لە ئەنجومەن پارێزگا و وەڕێوەبەرایەتی ریوبان و پیەڵەیل دیالە سەردانیگ مەیدانی ئەنجام دانە ئەرا هەڵسەنگانن رەوش پیەڵ حەمرین، کە وە دریژترین لە عراق هەژمار کریەێد، دۊای بەرزەوبوین ئاستەیل دەرياچەی حەمرین لە ئەنجام وارانەیل تون.

 وتیش: شاندەگە رماننیگ رخدر لە نزیکەوبۊیەیل پیەڵەگە دیاری کردنە، بی زەرەدمەنبوین پایە و هەڵگرە کۆنکرێتییەیل، دیاری کرد کە رماننەگە وە رخدار ئەرا ریوارەیل هەژمار کریەێد، لەوەر ئەوە کە پیەڵەگە وە شیوەیگ وەختانە واز کریا وەرجە رادەسکرنی و وازکردنی وە فەرمی لەلایەن کۆمپانیا جیوەجیکارەگەو.

وسەرچەوەگە وتیش: شاندەگە رەسینە گرنگی دووارە قایمکردن پیەڵەگە وە شیوەیگ وەختانە و پڕەوکردن ئەو رماننە کە لە نزیکەوبۊیەیل پیەڵەگە رۊ داگە، باوجی وەڕێوەبەرایەتی ریوبان و پیەڵەیل ناڵێد وە دەس نەوین تەرخانکردنە داراییەیل کە ری وەپێ دەێد کار لەبان پیەڵەگە و پرۆژەیل ترەک لە پارێزگاگە بکەێد، لە ئەنجام قەیران دارایی لە عراق.

پیەڵ حەمرین، لە باکوور خوەرهەڵات دیالە، وە دریژترین پیەڵ لە عراق هەژمار کریەێد وە دریژی زیاتر لە 7 کیلۆمەتر وەگەرد نزیکەوبۊیەیلی، لە وەختیگ خەرج دروسکردنی رەسێدە زیاتر لە 60 ملیار دینار عراقی.