شەفەق نیوز/ وەچەودیەیلیگ و کەسوکارەیل قوربانیەیل رمیان بینای تاقیگەی نیشتمانی لە ناوڕاس بەغداد، باس پەیانەکردن کەسەیلیان کردن لەناو قورتاربویەیل لە رویداوەگە.

کەسوکارەیل قوربانیەیل ئەرا ئاژانس شەفەق نیوز وتن: ٤ بیسەروشوین لە رمیان باڵەخانەگە لە مەیدان واسق ( ژنیگ و مناڵیگ و دوو پیاو) تا ئیسە پەیا نەکریانە.

وتنیش: تا ئی مەوقە پەیا نەکریانە، هەرچەن مینەکردن لەلایەن تیمەیل وەرگری شارستانی وەردەوامە.

دەزگای بەرهەمهاوردن نیشتمانی، خوەی لە رویداو رمیان بینایگ لە کەرادە، دویەکە شەممە، دویرەو خست، وتیش؛ لایەنە وەرپرسەیل لە بینا رمیایەگە هانە وەزارەت تەندروسی و ئەمینداری بەغداد.

شەوەکی دویەکە شەممە، وەڕێەوبەرایەتی وەرگری شارستانی، خەوەردا لە رمیان بینایگ چوار قاتی لەناوڕاس بەغداد پایتەخت.