ئەندام دەسەگە زەینەب ئەلخەزرەجی ئەرا ئاژانس شەفەق نیوز وت: وەزارەت تەندروسی پەیامیگ ئەرا وەزارەت ناوخۆ کل کردیە ئەرا تونکردن ریکارەیل ئەمنی لە دەروازە سنوورییەیل ئەرا ریگریکردن لە وەناوهاتن ماددە هووشبەرەیل لە وڵاتاەیل هاوسا.
خەزرەجی ئاشکرا کرد کە قاچاخچی مادەی هووشبەر ئەرا ناو عراق لە ری دەروازە سنوورییە فەرمی و نافەرمییەیل کریەێد، وتیش؛ هاتێ ئەو دەروازەیلە دەس چەتەیل دزەیل هاناویان، یەیش ئاسانکاری کەێد ئەرا هاتن مادەی هووشبەر ئەرا ناو خاک ێراق.
وتیش: دەسەگە داوا لە سەرۆک وەزیرەیل و وەزیر ناوخۆ کەێد ریکارە ئەمنییەیل قایمتر بکەن و جارجارە ئەندامەیل خزمەتگوزارییە ئەمنییەیل و فەرمانبەرەیل لە دەروازە سنوورییەیل ئاڵشت بکەن.
دووپاتیش کرد کە بەشیگ لە ئەندام و کارمەنەیل ئی مەرزەیلە دەس کردنە وە خەڵەتانن یاسایی ئەرا قاچاخی مادەی هووشبەر، یەیش قایمکردن چەودیاریکردن و پرسیارکردن لە کارمەنەیل خوازێد، و ئاڵشتکردن کارمەنە ناکارامەیل.