شەفەق نیوز/ سەرچەوەیگ ئەمنی لە سەڵاحەدین، ئمڕوو شەممە، خەوەردا لە رزگاربوین فەرماندەی فەوجیگ لە پۆلیس فیدڕاڵی و قوربانی بوین مەدەنییگ لە تەقینەوەی بومبیگ دانریاگ لە دەورگرد ناحیەی یەسرب لە باشوور سەڵاحەدین.

سەرچەوەگە ئەرا ئاژانس شەفەق نیوز وت: بومبیگ دانریاگ لە ناوچەی بەتار تەقیە بان عەقید موحیی جەشماوی فەرماندەی فەوج ١٣ی پۆلیس فیدڕاڵی، ک هێزیگ هاوبەش لە سوپا و حەشد هووزانە وەگەردی بوین، ک بویە هووکار کوشتن یەک مەدەنی لە نزیک رووداوەگە لەوەر زەخمداربوینی، و زەخمداربوین دووان لە حەشد و رزگاربوین فەرماندەی فەوجەگە.

وتیش؛ هێزەیلیگ لە پۆلیس دەسکردنە هەڵمەت وەشکین وە مینەی تاوانکارەیل.