شەفەق نیوز/ سەرچەوەیگ ئەمنی، ئمڕوو چوارشەممە، خەوەردا لە رزگارکردن دەیان دویەت خوەنەوار لەناو بەشەیل ناوخوەیی زانکۆی بەغداد لەلایەن وەرگری شارستانی.   

سەرچەوەگە ئەرا ئاژانس شەفەق نیوز وت: تیمەیل وەرگری شارستانی، ئیوارەی ئمڕوو، نزیکەی ١٠٠ دویەت لە کۆلێژەیل پزشکی و دەرمانسازی لە بەشەیل ناوخوەیی سەروە زانکۆی بەغداد، لە ناوچەی باب موعەزەم ناوڕاس بەغداد دراوردن، دویای رویداویگ ئاگر لەناو ئاشخانەی بەشەیل. 

لەلاییگتر، سەرچەوەگە خەوەردا ک تیمەیل وەرگری شارستانی تەقەلا دەن ئاگریگ لەناو کژوگیا و گەناڵخەی نزیکیگ لە ماڵەیلیگ لە پشت مزگەوت روحمان لە ناوچەی مەنسوور لە بەغداد کپەو بکەن، ودیاری کرد ک تیمەیل وەرگری شارستانی تەقەلا دەن ئاگرەگە لە ماڵەیل خەڵکەگە دویرە بخەن، ونەیلن کەسیگ زەخمدار بوود.