شه‌فه‌ق نيوز/ تووڕ " سى ئێن ئێن " ئه‌مريكى راپۆرتيگ وه‌ناونيشان " عراق چوين ده‌سميه‌ت دا له ده‌رخستن ئه‌بو به‌كر به‌غدادى سه‌ركرده‌ى داعش؟"، ك له‌تى باسه‌يليگ له‌بان رۆڵ عراق بڵاو كرد له‌زووان وه‌ڕيه‌وبه‌ر هه‌واڵگيرى و بڕيگ له وه‌رپرسه‌يل.
له‌ى باوه‌ته‌و، ليوا روكن سه‌عه‌د عه‌لاق سه‌رۆك وه‌ريه‌وبه‌رايه‌تى هه‌واڵگيرى سه‌ربازى عراقى، وت: ده‌سگيركردن زاواگه‌ى به‌غدادى له مايۆ ك ناسرياگه وه محه‌مه‌د عه‌لى ساجت ده‌سكه‌فت خاسيگ بوێ ئه‌را ته‌كتيك عراق له‌وه‌ر گه‌ردين له‌شوون به‌غدادى له‌ڕێ هه‌وڵداينى له‌ڕێگه‌ى نزيكترين كه‌سيگ له خوه‌يه‌و.
عه‌لاق له ديمانه‌يگ وت: وه‌شيوه‌يگ ناڕاسه‌وخۆ چه‌وديرى جموجويل به‌غدادى كرديايم له‌ڕێ خيزانه‌گه‌ى و ئه‌وه‌يش جووريگ له نهێنى وه‌پيمان داو ئيمه‌يش له‌يوا خوه‌مان ده‌رخستيم ك چه‌وديرى جموجويل به‌غدادى ناكه‌يم، له هه‌مان وه‌خت ساجت ده‌سميه‌ت به‌غدادى دا له وه‌ڕيه‌وبردن كاره‌يلێ له‌وه‌ختيگ گه‌شت كرد، له‌و باوه‌تيشه‌و ئه‌فسه‌ره‌يليگ له هه‌واڵگيرى عراقى ئه‌را توور سى ئێن ئين وتن زانياريه‌يل گرنگ پيشكه‌ش كردنه دوياى ئه‌وه‌گ ساجت ده‌سگير كريا له ده‌ورگرد به‌غدا له مايۆ 2019.
يه‌يش له‌وه‌ختيگ هيزه‌يل ئاسايش روێ له تونێليگ كردن له نزيك شار قائم له خوه‌رئاواى عراق و نزيك له مه‌رزه‌يل سووريا، ك بڕيگ تايبه‌تمه‌ندى به‌غدادى له‌تى دوينرياوه بيجگه خه‌ريته‌و تێبينيه‌يليگ له‌بان بريگ شوون ك وه خه‌ت ده‌س نويسياوێد.
جى باسه، ئه‌فسه‌ره‌يليش ئاماژه وه‌ئه‌وه كردن ك ساجت وتگه سه‌ركرده‌ى داعش ئه‌گه‌ره‌يل ئه‌وه هه‌س له پاريزگاى ئيدلب سوورى بدێ و هه‌ر له‌وه‌ر ئه‌وه‌يش عراق ئاگادارى هيزه‌يل هاوپه‌يمان كرد له‌بان ئه‌و زانياريه‌يله و دوياخريش ئاژانس هه‌واڵگيريه‌يل ناوه‌ندى و يه‌كينه‌يليگ ئه‌مريكى وه‌ل هيزه‌يل سورياى ديموكرات ك زوورميان كورد، تويه‌نستن ئه‌و ئه‌رك گرنگه جيوه‌جى بكه‌ن و په‌لامار ئه‌و شوونه بيه‌ن ك له‌تى خوه‌ى شاردوێده‌و، وه‌لێ ئه‌وه بوى به‌غدادى وه‌رجه ده‌سگيركردنى خوه‌ى كوشت.