شەفەق نیوز - بەغداد

باڵیۆزخانەی ئیرانی لە بەغداد، ئمڕوو شەممە، سوپاسگوزاری خوەی ئەرا سەرۆک ئەنجومەن وەزیرەیل عراقی عەلی زەیدی کرد لەبان پاڵپشتی و وەدۊاکەفتنی ئەرا وەڕیخستن 40 گەشت رووژانە، ئەرا کۆمپانیایل فڕۆکەوانی ئیرانی لە ناوەین هەردگ وڵاتەگە لەڕی فڕۆکەخانەی ناودەوڵەتی نەجەف.

 باڵیۆزخانەگە لە بەیاننامەیگ کە لەبان سەکوو "ئێکس" بڵاوی کردگە، ئومیدی نشان دا کە پەیوەندییەیل وەرەونواچگنیگ وەرچەو وەخوەیانەو بۊنن کە خزمەت بەرژەوەندی هەردگ گەلەگە بکەێد.

یە هاودەمە وەرد ئەوەگ حکومەت عراقی، دۊکە جمعە، رایگەیان لەباوەت رەسین وە رێککەفتنیگ کە ری دەێد وە ئەنجامداین 40 گەشت ئاسمانی رووژانە لە و وەرەو فڕۆکەخانەی ناودەوڵەتی نەجەف ئەرا کۆمپانیایل فڕۆکەوانی ئیرانی، بیجگە لە کۆمپانیای "ماهان".

کڕەیل ئاسمانی عراقی، هەفتەی گوزەشتە، دەسکردن گەشتەیلی وەرەو فڕۆکەخانەیل ئیرانی لەڕی فڕۆکەخانەی ناودەوڵەتی نەجەف راگەیانۊ، وەپەی بەیاننامەیگ کوڵ کە رەسیەسە ئاژانس شەفەق نیوز.

جێ باسە کە حکومەت عراقی بڕیاریگ دەرکردۊ کە فڕین لە فڕۆکەخانەیل عراقی وەرەو ئیران یا پیشوازی لە گەشتەیل ئاسمانی ئیرانی قەیەغە کەێد، وە وەڵامداین ئەرا ئەو سزایەیلە کە وەزارەت خەزانەی ئەمریکی لە هەشت ئەیلول/ سێپتەمبەر گوزەشتە چەسپانۊیەدەی بان 36 لایەن پەیوەندیدار وە کەرت فڕۆکەوانی ئیرانی، کە 27 کۆمپانیای فڕۆکەوانی لەناویانە.

 لە 29ی ئەیلول گوزەشتە، وەزارەت خەزانەی ئەمریکی، لەڕی نووسینگەی چەودیاریکردن سامانە بیگانەیل (OFAC)، مووڵەتیگ تایبەت ئەرا کۆمپانیای کڕەیل ئاسمانی عراقی دەرکرد کە ری وەپی دەێد مامەڵەیل ئاسایی و خوازیاگ ئەنجام بەێد ئەرا وەکارخستن خزمەتگوزارییەیل گواستنەوەی سەرنشینەیل لە ناوەین عراق و ئیران - لەڕی فڕۆکەخانەی نەجەف - لە چوارچیوەی مەرج و کۆت و بەنەیل دیاریکریاگ.