شەفەق نیوز - بەغداد / واشنتۆن 

هاوردەیل وڵاتەیل یەکگرتگ لە نەفت خاو عراقی، لە ماوەی هەفتەی گوزەشتە، سفر توومار کرد ئەرا شەشەمین هەفتە لەبانیەک.

 زانیارییەیل ئیدارەی زانیارییەیل وزەی ئەمریکی، کە ئاژانس شەفەق نیوز چەوی کەفتەسە پی، نیشان دان کە مامناوەن هاوردەیل وڵاتەیل یەکگرتگ لە نەفت خاو لە دە دەوڵەتە سەرەکییەگە رەسیەسە 6.003 ملیۆن بەرمیل رووژانە لە ماوەی هەفتەی گوزەشتە، کە وە بڕ 124 هەزار بەرمیل رووژانە نزمەو بۊە وە وەراورد وەرد هەفتەی وەرجە خوەی، کە 6.127 ملیۆن بەرمیل رووژانە توومار کردۊد.

 زانیارییەیل نشان دان کە کەنەدا کەفتە نوای لیست گەورەترین دابینکەرەیل نەفت خاو ئەرا وڵاتەیل یەکگرتگ وە مامناوەنیگ کە رەسیە 3.991 ملیۆن بەرمیل رووژانە، دۊای ئەوەیش ڤەنزوێلا هات وە رێژەی 555 هەزار بەرمیل رووژانە، دۊاتر بەرازیل وە مامناوەن 396 هەزار بەرمیل رووژانە، و سعودیە وە رێژەی 293 هەزار بەرمیل رووژانە.

 مەکسیک وە پەنجەمین هات وە مامناوەن 283 هەزار بەرمیل رووژانە، دۊای ئەوەیش غیانا هات وە رێژەی 194 هەزار بەرمیل رووژانە، دۊاتر ئەرجەنتین وە مامناوەن 146 هەزار بەرمیل رووژانە، و نێجیریا وە رێژەی 79 هەزار بەرمیل رووژانە، و کۆلۆمبیا وە مامناوەن 66 هەزار بەرمیل رووژانە، لە وەختیگ هاوردەیل ئەمریکی هیچ بڕیگ لە نەفت خاو عراقی توومار نەکردنە لە ماوەی هەفتەی گوزەشتە.

و مەزەنە کریەێد وەکارهاوردن رووژانەی وڵاتەیل یەکگرتگ لە نەفت وە نزیکەی 20 ملیۆن بەرمیل، تا بوودە گەورەترین وەکارهاور ئەرا نەفت لە جیهان.