شەفەق نیوز - واشنتۆن

سەرچەوەیلیگ عراقی، رووژ یەکشەممە، ئاشکرا کردن لە فرووشتن 10 ملیۆن بەرمیل نەفت لەلایەن عراقەو لەی دۊاییە لەڕی بەندەرە باشوورییەیلەو، وە شکاننیگ کە لە ناوەین 25 و 28 دۆلار ئەرا هەر بەرمیلیگ بوود.

 سەرچەوەیل ئەرا پلاتفۆرم "تاقە" وتن، کە ئاژانس شەفەق نیوز ئاگادار بۊ لەلی، کە فرەی ئی بارەیلە کۆمپانیایەیل هیندی وەدەسیان کەفتگە، وە دەسنشانکردن ئەوە کە بارکردنیان لە بەندەرە باشوورییەیلەو وەرجە چەن رووژیگ روی داگە.

لە وەرانوەر ئەوە، دوو سەرچەوەی ترەک رووشنەو کردن، وەپەی پلاتفۆرمەگە، کە عراق نەتۊنستگە هیچ بەرمیلیگ نەفت وە نرخیگ بفرووشێد کە لە 100 دۆلار رەد کەێد لە سەرەتای جەنگ ئیرانییەو، بیجگە بەرزەوبۊن نرخە جەهانییەیل ئەرا نزیکەی 117 دۆلار ئەرا هەر بەرمیلیگ لە دۊایین دانیشتن مامەڵەکردن.

لە لای خوەیەو، سەرچەوەیگ لە کۆمپانیای وەبازاڕکردن نەفت عراقی "سۆمۆ" وت: "لەی دۊاییە نەتۊنستیم نەفت وە فرەتر لە 85 دۆلار ئەرا هەر بەرمیلیگ بفرووشیمن، و وەرجە نزیکەی مانگیگ کۆمپانیاگە بڕیگ لە بارەیل نەفت سووک وە نزیکەی 90 دۆلار ئەرا هەر بەرمیلیگ فرووشتگە".

جی باسە کە روانگەی "ئیکۆ عراق" تایبەتمەن وە کاروبار ئابووری، دۊکە شەممە، راگەیان کە نرخ هەناردەیل نەفت خاو عراقی رەسیە نزیکەی 37.39 ملیار دۆلار، لە وەرانوەر هەناردەکردن 533.46 ملیۆن بەرمیل لە ماوەی نۆ مانگ ساڵ 2026.