شەفەق نیوز/ شانەی راگەیانن ئەمنی، ئمڕوو سێشەممە، دەسگیرکردن داواکریاییگ وە توومەت تیرۆر و باندیگ راگەیانن ک تاوان کوشتن جیوەجی کردیە، و هەمیش پەنج داواکریاگ دەسگیر کریا لە بەغداد.

شانەی راگەیانن ئەمنی لە بەیاننامەیگ رەسیە ئاژانس شەفەق نیوز وت: هیزیگ لە فیرقەی پیادەی شەشەم، توەنست توومەتباریگ وەگورەی مادەی ١/٤ تیرۆر دەسگیر بکەێد،  دویای رەسین زانیاری هەواڵگری هویردیگ ک لە ناوچەی وەرپرسایەتی هەسەی، و جویلەکردنی لە قەزای ئەبو غرێب دریای کریا.

بەیاننامەگە وتیش: هیزیگ لە لیوای سێیەم فیرقەی یەکەم پۆلیس فیدراڵی توەنست باندیگ دەسگیر بکەێد ک تاوان کوشتن جیوەجی کردیە، ک دوو کەس بوینە،  ئەوەیش دویای رەسین زانیاری لە تاوانیگ، وەکوتپڕ تیمیگ هاوبەش دروس کریا، وروی وەرەو شوین رویداوەگە کریا، و دویای لێکۆڵینەوە و نووڕین کامیرایل چەودیریکردن ناسیان، و لە ناوچەی کەرادەی ناوڕاس بەغداد پایتەخت دەسگیر کریان.

شانەگە لە بەیاننامەگەی دیاری کرد ک مەفرەزەیل وەڕێەوبەرایەتی کاروبار خاڵەیل، مەوقەی وەشکین ماشین وکەسەیل توەنست پەنج توومەتبار وەگورەی مادەیکیگ یاسایی دەسگیر بکەن، مەوقەی هاتنیان وەرەو بەغداد پایتەخت لە خاڵەیل (ئەبو غرێب، ئەبو غرێب نوو، ئینتسار، تاجی، شاری دیجلە).