شەفەق نیوز- کەرکوک/ ئەنبار

سەرچەوەیگ ناوخۆیی لە پارێزگای کەرکوک، ئمڕوو شەممە، خەوەردا کە چەکدارەیلیگ نەناسیای تەقە فە 4 ماڵ لە ناوچەی پەنجا عەلی لە شار کەرکوک کردن.

سەرچەوەگە، ئەرا ئاژانس شەفەق نیوز وت، کە چەکدارەیل وە وەکارهاوردن چەک رەشاش تەقە لەبان ئەو ماڵەیلە کردن وەرجە ئەوەگ وەرەو شوین نادیاریگ بوان، کە یەیش بۊە مدوو زەرەدەیل ماددی لە روی ماڵەیل، وە بی توومارکردن هیچ زەخمدارییگ گیانی لەناو دانیشتگەيلیان.

وتیش کە هیزیگ ئەمنی رەسیە شوین رۊداوەگە دۊای وەرگردن خەوەریگ لە هاووڵاتییەیل، و بازنەیگ ئەمنی لە دەورگرد ناوچەگە چەسپان، لە وەختیگ تیمەیل بەڵگە تاوانکارییەیل دەسکردنە هەڵگردن فیشەکە بۆشەیل و بەڵگەدارکردن شوینەوارەیل رۊداوەگە، وەگەرد گردەوکردن وتەی خاوەن ماڵەیل و وەچەودیەیل.

وتیش کە پۆلیس کەرکوک لێکۆڵینەوە وە رۊداوەگە واز کرد، و دەس کردە مینەکردن لەشۊن تەقەکەرەیل، و وەدۊاچگن توومارەیل کامێرایەیل چەودیاری نزیک و سوودوەرگردن لە زانیارییەیل هەواڵگری ئەرا دیاریکردن رێڕەو واینیان.

 وەپای سەرچەوەگە، لێکۆڵینەوە سەرەتاییەیل نشان دەن کە رۊداوەگە خاوەن سروشتیگ تاوانکاری بوود، وەگەرد وەردەوامبۊن لێکۆڵینەوەیل ئەرا تەواوکردن رێکارەیل یاسایی و رەسین وە تاوانبارەیل و پیشکەشکردنیان ئەرا دادگا.

وەگەرد یەیش، سەرچەوەیگ ئەمنی لە پارێزگای ئەنبار، ئمڕوو شەممە، خەوەردا کە گەنجیگ لە خەڵک ناوچەی سوفیە لە شار رەمادی، هەڵسیا وە هەڵواسین خوەی لەناو ماڵەگەی.

 سەرچەوەگە، لە قسەیلی ئەرا ئاژانس شەفەق نیوز دیاری کرد کە گەنجەگە لە ئەنجام رۊداوەگە گیان لەدەس دا، لە وەختیگ تا ئیسە ئەو مدووویلە کە لە پشت ئی کارە بۊنە نەزانیانە، و لایەنە پەیوەندیدارەیل دەس کردنەسە لێکۆڵینەوە لە هۊردەکارییەیل رۊداوەگە.