شەفەق نیوز/ سەرچەوەیگ ئەمنی لە پارێزگای دیالە، ئمڕوو جومعە، خەوەردا لە مردن و زەخمداری 23 مەدەنی وە رویداو هاتوچو لەبان ری بەغدا-کەرکوک لە خوەرهەڵات پارێزگای سەڵاحەدین.
سەرچەوەگە وە ئاژانس شەفەق نیوز وت، 13 کەس گیان لەدەسدایە و 10 کەسیش زەخمدارە وە رویداو هاتوچو لەئەنجام لەیاکداین 3 ماشین لەبان ری بەغدا-کەرکوک نزیک قەزای دوزخورماتوو لە خوەرهەڵات سەڵاحەدین.
وتیش مەفرەزەیل فریاکەفتن وەرگیری شارستانی تەرم قوربانیەیل ئەرا فەرمانگەی پزیشک دادوەری کلکردن و زەخمدارەیلیش ئەرا چارەسەر کلکریانە خەسخانە، دیاریکرد، دەسڵاتدارەیل هاتوچو رێکارەیل یاسایی گرنەوەر.