شه‌فه‌ق نيوز/ به‌رهه‌م ساڵح سه‌رۆك كۆمار عراق، ره‌زامه‌ندى ده‌رخست له‌بان داواكاريه‌گه‌ى محه‌مه‌د ته‌وفيق عه‌لاوى ئه‌را خوه‌يكيشانه‌وه‌ى له راسپاردنى ئه‌را دامه‌زرانن حكومه‌ت.
له‌ى باوه‌ته‌و، نويسينگه‌ى سه‌رۆكايه‌تى كۆمار له به‌ياننامه‌يگ ئاماژه وه به‌ياننامه‌گه‌ى محه‌مه‌د ته‌وفيق عه‌لاوى راسپارياێ ئه‌را دامه‌زرانن حكومه‌ت كرد له‌باره‌ى ئه‌وه‌گ ناتويه‌نێد حكومه‌ت دامه‌زرنێد له‌ماوه‌ى دياريكرياێ ده‌ستوورى و وه‌گووره‌ى خاڵه‌يل ماده‌ى 76 له ده‌ستوور، سه‌رۆك كۆمار ده‌س ئه‌كاده راوێژ وه‌خاتر هه‌ڵوژانن كانديديگ تر شوونگره‌وه له ماوه‌ى 15 رووژ له چوارچيوه‌ى وه‌رپرسيارێتيه ده‌ستوورى و نيشتمانيه‌گه‌ێ.
باس له‌وه‌يش كرد سه‌رۆك كۆمار سوپاسگوزاريييگ پيشكه‌ش وه ته‌وفيق عه‌لاوى ئه‌كا له‌بان هه‌وڵه‌يل و هه‌ڵويستى له‌باره‌ى خوه‌كيشانه‌وه‌ى و داوايش له لايه‌نه‌يل سياسى ئه‌كا كار جددى بكه‌ن له‌وه‌ر ره‌سين ئه‌را ريككه‌فتنيگ نيشتمانى سه‌باره‌ت وه شوونگره‌وه‌ى عه‌لاوى ك له‌لايه‌ن مه‌ردمه‌و په‌سه‌نكرياێ بدێ له ماوه‌ى دياريكرياێ ده‌ستوورى له‌وه‌ر خاتر دامه‌زرانن حكومه‌تيگ وه‌هيز بتويه‌نێد ئه‌ركه‌يل خوه‌ى وه ته‌واوى ئه‌نجام بيه‌ێد.
جى باسه، وه‌رجه چه‌ن ده‌قه‌ى كه‌ميگ ك محه‌مه‌د عه‌لاوى ئاشكراى خوه‌يكيشانه‌وه‌ى خوه‌ى كرد له راسپاردنى ئه‌را دامه‌زرانن حكومه‌ت و داوايگ له‌و باوه‌ته‌و پيشكه‌ش كرده سه‌رۆك كۆمار عراق، وه‌و خاتريشه سه‌رۆك كۆمار داواگه‌ى له خوه‌يكيشانه‌وه‌ى له راسپاردنى ئه‌را دامه‌زرانن حكومه‌ت په‌سه‌ن كرد.