سەرچەوەگە ئەرا ئاژانس شەفەق نیوز وت: بومبیگ دانریاگ تەقیە روی شوانبگ لە ئاوای دەکا ئیبراهیم بەگ خوەرهەڵات قەزای خانەقین، ک بویە هوکار زەخمداربوینی.

سەرچەوەگە وتیش: بومبیگ لە جیماگەیل ریخریاگ داعش، لە ناوچەی باودووش باکوور خوەرھەڵات مووسڵ تەقیەو، ک بویە هوکار زەخمداربوین کەسیگ مەدەنی.

هەرلیوا، وەڕیەوبەرایەتی هەواڵگری سەربازی، دەسگیرکردن ٤ تیرۆرست و ١٩ توومەتبار لە نەینەوا و بەغدا و ئەنبار راگەیان.

وەڕیەوبەرایەتیەگە لە بەیانامەیگ رەسیە ئاژانس شەفەق نیوز وت: وەگورەی زانیاریەیل هەواڵگری هویرد، ٤ تیرۆرست  داواکریاگ وەگورەی مادەی چوار تیرۆر لە قەزای تلکێل و ناحیەی شورا و لەتیفیە و خاڵ شەهید سەبهان لە دەروازەی نەینەوا دەسگیر کریان، هەمیش ١٩ توومەتبار وە مادەیل یاسایی جیاجیا لە قەزای تەلەعفەر و رەمادی و ناحیەی زوممار و شەماڵ و حەمام عەلیل، و دریانە دەس لایەنەیل پەیوەندیدار.