شەفەق نیوز- نەجەف

سەرۆک وەزیرەیل عراق عەلی فالح زەیدی، ئمڕوو سێشەممە، رەسیە پارێزگای نەجەف ئەرا بەسانن گردەوبوین ئەنجومەن وەزیرەیل، و ئاگاداربوین لە رەوش خزمەتگوزاری لە پارێزگاگە.

سەرچەوەیگ لە پارێزگای نەجەف، شەممەی گوزەشتە ئاشکرا کرد،  ئەنجومەن وەزیرەیل گردەوبوین ئاسایی خوەی ئمڕوو سێشەممە لە پارێزگای نەجەف بەسێد، وە ئامادەبوین سەرۆک ئەنجومەن وەزیرەیل.

سەرچەوەگە ئەرا ئاژانس شەفەق نیوز وت، دیدارەگە باسکردن گشت پڕۆژەیل خزمەتگوزاری و ئاوەدانکردن لە پارێزگاگە وەخوەیەو دوینێد، وەرد لێکۆڵینەوە لەو نواگیریەیلە کە رویڕوی جیوەجیکردنیان و رەوت پرۆسەی ئاوەدانکردن بوینەسەو.

وەپای سەرچەوەگە، کۆبوینەوەگە دەرکردن بڕیارەیلیگ وەخوەیەو دوینێد کە پشتگیری لە پڕۆژەیل کەن و تەواوکردنیان گورجەو کەن و چارەسەر ئەو گیچەڵەیلە کەن تێدە رێیان، وە جۊریگ  بەشداری بکەێد لە خاسەوکردن رەوش خزمەتگوزاری و ئاوەدانکردن لە نەجەف.