شه‌فه‌ق نيوز/ ده‌زگايه‌يل ئاسايش به‌لجيكى و بريتانى, پرووسه‌يگ هاوبه‌ش ئه‌نجام دان و باس له‌وه ئه‌كريه‌ێد تووڕيگ وه‌قاچاخ بردن كووچكه‌ره‌يل له عراق گرتنه‌سه ئامانج وه شيوه‌يگ ناياسايى.
له‌ى باوه‌ته‌و نوێنه‌رايه‌تى گشتى شار ئه‌نتويرب به‌لجيكى له به‌ياننامه‌يگ ئاشكراى ده‌سوه‌سه‌ركردن چوار گومانليكرياێ كرد له‌چوارچيوه‌ى پرووسه‌يگ ك له‌لايه‌ن ده‌زگايه‌يل ئاسايش هه‌ردوگ وڵاته‌و له كووتايه‌يل نۆڤه‌مبه‌ر گوزه‌يشت جيوه‌جى كرياگه‌و باس له‌وه‌يش كرد گرتنه‌گه جى شانشين يه‌كگرتگ و به‌لجيكاو له ته‌ياره‌خانه‌ى سخيبول له ئمستردام پايته‌خت هۆڵه‌ندا.
به‌ياننامه‌گه ئاماژه وه‌يه‌يش كرد ئه‌و پرووسه دوياى ئه‌وه ئاشكرا كرياگه ك پۆليس ئه‌نتويرب ئه‌راى ده‌ركه‌فگه ماڵيگ پيشوازى له كووچكه‌ره‌يل كردگه وه‌رجه وه‌قاچاخ بردنيان له‌ڕى ده‌رياى مانش و جه‌ختيش له‌وه كرد سه‌رۆك تووڕه‌گه‌يش له شانشين يه‌كگرتگ ده‌سگير كرياگه.