شەفەق نیوز/ کەشناس عراقی عەلی جابر زیادی، ئمڕوو پەنجشەممە، مەزەنە کەێد وڵاتەگە بکەفێدە ژیر کاریگەری کەشوهەوای سەردیگ لە ماوەی دوو رووژ ئایندە لە پشتی پارچە وای گەرمیگ تێد کەشوهەوا وەهاریەو کەێد.
زیادی وە ئاژانس شەفەق نیوز وت، " عراق لە ئمڕووە کەفێدە وەر کاریگەری پارچە وای سەردیگ و پلەی گەرما داوەزێد وە دوو پلەی سەدی، و ئەو شەپوول سەرمایە لە ماوەی دوو رووژ ئایندە تێد بوودە هووکار داوەزین پلەی گەرما وە جیاوازی کەمیگ، لەوەر گورجی وای سیمون لە شەو هەس وە سەرما کریەێد".
ئاشکەرایکرد، بەشەیل باکوور و شارەیل خوەرئاوا مەزەنەکریەێد بەستەیگ دروس بکەن لەماوەی دوو رووژ ئایندە نزمترین پلەی گەرما رەسێدە سفر پلەی سەدی، و کەشوهەوای شارەیل ناوڕاس و باشوور تەنیا سەردە، و پلەی گەرما لە رووژ رەسێدە 15 پلەی سەدی و لە شەو رەسێدە 3 پلەی سەدی.
دیاریکرد، " شەپوول سەرماگە لە رووژ یەکشەممەوە وەرەو کەمبوین چێد، وەجویریگ بارستە وای گەرمیگ تێد و کەشوهەواگە وەهاریەو کەێد.