شەفەق نیوز/ وەزارەت کارەبای عراق، ئمڕوو دووشەممە، جیگیربوین وزە لە بەغداد و پارێزگایل عراق ئەرا چەن مدوویگ گلەو دا، دیارترینیان هوونکی کەشوهەوا لەی ماوە.
ئەحمەد موسا قسەکەر وەزارەتەگە ئەرا ئاژانس شەفەق نیوز وت: جیگیربوین وزە ئەرا پلان وەرجەوەختەی وەزارەتگە گلەو خوەێد کە دەسوەپی کرد وە ئامادەکاری ئەرا وەرز زمسان، و دیاری کرد شمارەیگ لە یەکەیل بەرهەمی دویای خاسەوکردن کەفتنەو کار.
وەگەرد ئەوەیش، موسا دیاری کرد کە گاز نیشتمانی ئەرا ویستگەیل کارەبا لە ناوچەی باشوور دووارە خریا کار، دویای وسیانی ئەرا خاسەوکردن، مە وەزارەت نەفت دووارە دەسکردە بەرهەمکردنی.
موسا وتیش: هەماهەنگی بەرز ناوەین وەزارەت کارەبا و نەفت دەسمیەتی دا لە دابینکردن گازۆیل ئەرا ویستگەیل کارەبا، وەتایبەت ئەرا ناوچەیل بەغداد و ناوڕاس کە زیان لە کەمی گاز ئیرانی دیرن، کە تەمەنی لە ٤٠ ئەرا ١٥ ملیۆن مەتر چوارگووشە داوەزیا.
وتیش: هەمیش هوونکی کەشوهەوا لەی رووژەیلە دەسمیەتی دا لە سووکەوکردن بارەیل، کە هیشت ساعەتەیل وەکارخشتن جیگیر بوود.
جی باسە کە بەغدا و ئەو پارێزگایل عراق یە ماوەی دە رووژە کارەبای جیگیریگ وەخوەیان دوینن، دویای بڕیانی ئەرا وەختەیل فرەیگ لە تاوسان گوزەشتە.