شه‌فه‌ق نيوز/ كۆمه‌ڵه‌ى ژنه په‌رله‌مانتاره‌يل له به‌ياننامه‌يگ داوا له ئه‌نجومه‌ن باڵاى دادوه‌رێ كردن مه‌رزيگ ئه‌را فه‌سڵ عه‌شايرى دابنريه‌ێد وه ئه‌وه‌گ ديارده‌يگ كويه‌ن وه‌كار برياگه‌و له‌يوا له ئافره‌ت ئه‌كا جوور كاڵايگ سه‌ندن و فرووشتن وه‌پيه‌و بكريه‌ێد له‌لايه‌ن خيزانيه‌و وه‌بى ئه‌وه‌گ هويچ ئعتباريگ ئه‌را ئنسانيه‌ى دابنريه‌ێد وه‌تايبه‌ت له‌وه‌خت هه‌ڵوژانن هاوسه‌ر ژيانى.
له‌ى باوه‌ته‌و، ئاڵا تاڵه‌بانى سه‌رۆك كۆمه‌ڵه‌ى ژنه په‌رله‌مانتاره‌يل له به‌ياننامه‌يگ ئه‌را شه‌فه‌ق نيوز وت: جاريگتر له‌نوو ئه‌نجومه‌ن باڵاى دادوه‌رى بڕگه‌يگ تر رووشنكه‌ر ئه‌خاده بان زنجيره ده‌سكه‌فته‌يلێ له به‌رژه‌وه‌ندى ئافره‌ت عراقى، ك دوياى بڕيار ئه‌نجومه‌نه‌گه له‌باره‌ى نه‌هوه‌ى عه‌شايرى و داناينى جوور هه‌ڕه‌شه و كرده‌وه‌يگ تيرۆريستى ئمڕوويش رينمايه‌يل تر ده‌رئه‌كا له‌وه‌ر داناين مه‌رزيگ ئه‌را ديارده‌ى ته‌حڕوشكردن وه ژنه‌يل له شوونه‌يل گشتى و له ده‌زگايه‌يل ده‌وڵه‌ت، وه‌ل ده‌ركردن رێ وشوونه‌يليگ ئه‌را ئه‌وانه‌گ ته‌حه‌ڕوش ئه‌كه‌ن وه ئافره‌ته‌يل كارمه‌ند، بيجگه به‌شداركردن ژنه‌يل له ليژنه‌يل په‌يجورى ك له‌ى باوه‌ته‌و دامه‌زريه‌ێد.
جى باسه، تاڵه‌بانى باس له‌وه‌يش كرد ك كۆمه‌ڵه‌گه ئى گامه له‌لايه‌ن فايق زه‌يدان سه‌رۆك ئه‌نجومه‌ن باڵاى دادوه‌رييه‌و به‌رز نرخنێد و داوايش له سه‌رۆكايه‌تى ئه‌نجومه‌ن وه‌زيره‌يل ئه‌كا گام هاوشيوه بنه‌ێد ئه‌را ئنسافكردن ژنه‌يل و دگان وه رۆڵ گه‌وراى ژنه‌يل بنه‌ێد له بنياتناين كۆمه‌ڵگاو خيزان و په‌روه‌رده‌كردن نه‌وه‌ێ خاسيگ.