شەفەق نیوز - بەغداد

دادگای تاوانەیل کەرخ لە بەغداد، رووژ چوارشەممە، فەرمان زیندانیکردن هەتاهەتایی لەبان شەش تاوانبار دەرکرد کە رەگەزنامەی فەرەنسی هەڵگردنە، لەبان تاوان سەرگرتن ئەرا ریخریاگ "داعش" تیرۆریست، تا وەگەرد ئەوە بڕ گشتی شمارەی فەرەنسییە حوکمدریاگەیل لەی دۆسیە بەرزەو بوود ئەرا 16 تاوانبار.

 راگەیانن ئەنجومەن باڵای دادوەری، لە بەیاننامەیگ رەسیە ئاژانس شەفەق نیوز، دیاری کرد کە دەرچگن فەرمانەیل وە ئامادەبۊن پارێزەر تاوانبارەیل و نۊنەرەیل لە باڵیۆزخانەی فەرەنسی لە عراق وەڕیەو چگ.

 فەرمانەگە وەپەی مادەی چوارەم/ یەکەم، وە بەڵگەی مادەی دۊیەم/ یەکەم و سێیەم لە یاسای نەهیشتن تیرۆر شمارە 13 ئەرا ساڵ 2005 دەرچگ، و وە بەڵگەهاوردن وە فەرمان مادەی 132/ یەکەم لە یاسای سزایەیل.

 دەسەڵاتەیل عراقی وەرجەیە گرووپیگ وەرگردۊن کە 47 توومەتبار لەخوەی گرێد کە رەگەزنامەی فەرەنسی هەڵگردنە لە باکوور خوەرهەڵات سووریا، و دادگای لێکۆڵینەوەی کەرخ یەکەم وەرپرسیارییەتی لێکۆڵینەوە وەردیان گردە مل  وە پاڵپشتی لە ناوەند نیشتمانی ئەرا هەماهەنگی دادوەری ناودەوڵەتی، کە بەشداری کرد لە وردبینی بەڵگە و بەڵگەنامەیل وە پشت بەسین وە بنکەی زانیارییە نیشتمانییەگەی، وەرجە رەوانەکردن توومەتبارەیلە ئەرا دادگای تایبەتمەن.

 دادگای عراقی، لە 20 ئەیلول/ سێپتێمبەر 2026، دەس کرد وە ریکارەیل دادگاییکردن شەش فەرەنسی لە گرووپەگە، لە ناو ریکارەیل ئەمنی تون، و وە ئامادەبۊن نۊنەرەیل لە باڵیۆزخانەی فەرەنسی، لە وەختیگ دانیشتنەیل دۊر لە رووماڵکردن راگەیانن وەڕیەو چگن.

 لە 27 تشرین یەکەم/ ئۆکتۆبەر گوزەشتە، دادگای تاوانەیل کەرخ فەرمان زیندانیکردن هەتاهەتایی لەبان شەش فەرەنسی دەرکرد، و وە زیندانیکردن 15 ساڵ لەبان هەفتەمین تاوانبار، لە وەختیگ لە 29ی خود مانگ فەرمانەیل هاوشیوە وە زیندانیکردن هەتاهەتایی لەبان سێ فەرەنسی ترەک دەرکرد، وەرجە ئەوەگ ئی شەش فەرمانە کە ئمڕوو دەرچگ، تا بڕ گشتی سزادریایل بڕەسێدە 16 فەرەنسی.