شەفەق نیوز/ دەسەی دارایی لە پەرلەمان عراق، ئمڕوو چوارشەممە، نوقڵانە دا لە تەقەلای حکومەت فیدڕاڵی وەسەرۆکایەتی موستەفا کازمی ئەرا وەکارهاوردن قەرزکردن پویل جوور جیگریگ ئەرا بوودجەی گشتی لە ساڵ ٢٠٢١، و لەخود وەختەگە هووشداری کرد لە پەنابردن ئەرا ئیجوور تەقەلایلیگ.
جەمال کۆچەر ئەندام دەسەگە ئەرا ئاژانس شەفەق نیوز وت: حکومەتەگە بنەمای قەرزکردن ئەرا وەڕیووبردن و دابینکردن مووچەی فەرمانبەرەیل لەجیای بودجەی گشتی وەکارهاورد، بەڵکم خوازێد لە ساڵ ئایندە دوواریەو بکەێد، تا قەرزکردن بوودە جیگریگ ئەرا پڕۆژەی یاسای بوودجەی گشتی.
وتیش؛ دەسەی دارایی لە پەرلەمان ری وەحکومەت نیەێد ک جاریگ تر پەنا وە قەرزکردن بیەێد، ودووپاتکرد ک ساڵ ئایندە وەبی بوودجەی گشتی رەد نیەوود، و جیگریگ ئەرای نیە.
کۆچەر داوا لە حکومەت کرد رەوانەی رەشنووس یاسای بوودجەگە ئەرا پەرلەمان بکەێد وەرجە کۆتایی ساڵ ٢٠٢٠.