شەفەق نیوز/ هیزەیل ئەمنی عراق، ئمڕوو چوارشەممە، چوار توومەتبار لەبان پەلاماردان سەربازگەی عەین ئەلئەسەد دەسگیر کردن، کە ئەو سەربازگەی ئاسمانیە سەربازەیل ئەمریکی و راوێژکارەیل هاوپەیمان ناودەوڵەتی هانە ناوی.
سەرچەوەیگ ئەمنی ئەرا ئاژانس شەفەق نیوز وت: هیزەیل ئەمنی ٤ کەس دەسگیر کردن، گومان لەبانیان هەس کە پەلامار وەبان سەربازگەی عەین ئەلئەسەد لەی رووژڵیل گوزەشتە جیوەجی کردنە.
ئەو پەلامار دویاییە وەبان سەربازگەی عەین ئەلئەسەد لە عراق، بویە هوکار زەخمداری ٥ سەرباز ئەمریکی و دووانیش خاوەن گریەبەسی، کە راپۆرتەیل باسی کردن کە سەختترین پەلامارە لەناو زنجیرەی پەلامارەیل وەبان ئەو سەربازگەی ئاسمانیە وەماوەی کەمتر لە یەک مانگ.
ئی پەلامارە لە وەختیگ تیەێد جەنگ لە خوەرهەڵات ناوڕاس کەفتیەسە ئەگەر، دویای ئەوەگ ئیسرائیل ئیسماعیل هەنیە سەرۆک نویسینگەی سیاسی بزووتنەوەی حەماس لە تەهران کوشت، و فوئاد شوکور فەرماندەی سەربازی لە حزبولڵا لە بەیروت کوشت، و مەزنەی کەورەیگ هەس ئیران تووڵە بسینێدەو، کە ئەگەر قومیان جەنگیگ فراوانتر لە ناوچەگە زیایەو کەێد.