شەفەق نیوز- بەغداد

سەرچەوەیگ ئەمنی، ئمڕوو یەکشەممە، خەوەر دا لە دەسگیرکردن یەکیگ لە کوڕەیل ئەوەگ وە "ئەبو درع" ناسریاس لە بەغدای پایتەخت.

 سەرچەوەگە وە ئاژانس شەفەق نیوز خەوەر دا، کە "هیزیگ ئەمنی سەر وە پۆلیس فیدراڵی (عەلوول) یەکیگ لە کوڕەیل (ئەبو درع) دەسگیر کرد کە داواکریاس وەپەی مادەی 4 تیرۆر لە یەکیگ لە ناوچەیل رەسافە لەناو بەغدای پایتەخت.

 دادگای لێکۆڵینەوەی ناوەندی لە بەغداد، لە 28 نیسان گوزەشتە، یاداشت دەسگیرکردن دەرکرد وەرانوەر ئەوەگ ناوی ئیسماعیل حافز عەبد عەلی لامی یە، کە نازناو "ئەبو درع" دیرێد، و یەیش لەبان بنەمای سکاڵایگ فەرمی کە ئەمینداریەتی بەغداد پیشکەشی کردۊد.

 وەپەی نۊنەر یاسایی ئەمینداریەتیەگە، تومەتەگە دیاری کەێد کە "ئەبو درع" پەلامار بینای فەرمانگەی خانووبەرە داگە کە سەر وە ئەمینداریەتیەگەس، و هەڕەشە لە هاووڵاتییەیل و فەرمانبەرەیل و ئەندامەیل پاسەوانی ئەمنی کردیە، وە ئامانج ناچارکردنیان لەبان جیگیرکردن یەکیگ لە مەزادەیل ئەرا قازانج خوەی.

 "ئەبو درع" لەو کەسایەتییەیل جی مشتومڕە هەژمار کریەێد کە ناوی پەیوەندی وە رۊداوەیل تونوتیژی تایفەگەری دیرێد کە عراق دۊای ساڵ 2005 وەخوەیەو دییەسەی، کە کەفتە وەر تومەتەیل وەرینیگ بۊ لەباوەت کارەیل کوشتن و بارکردن زوورملی وەرجە چەن ساڵیگ لە دەرکەفتن ریخریاگ داعش لە ساڵ 2014.